பொலிவுறு நகரத் திட்டம்: அடிக்கல் நாட்டிய முதலமைச்சர்

புதுச்சேரி: பொலிவுறு நகரத் திட்டத்தின்கீழ் சின்னையாபுரம் பகுதியில் ரூ.18 கோடியில் அடுக்குமாடிக் குடியிருப்புப் பணியினை முதலமைச்சர் நாராயணசாமி தொடங்கிவைத்தார்.

புதுச்சேரியில் மத்திய அரசின் பொலிவுறு நகரத் திட்டத்தின்கீழ் பொருளாதாரத்தில் பின்தங்கிய மக்களின் மேம்பாட்டிற்காக 220 வீடுகள் கொண்ட அடுக்குமாடிக் குடியிருப்பு அமைக்கும் பணி தொடங்கப்பட்டது.

புதுச்சேரி ராஜ்பவன் தொகுதிக்குள்பட்ட சின்னையாபுரம் பகுதியில் 18.04 கோடி ரூபாய் மதிப்பீட்டில் கட்டப்படும் கட்டடத்திற்கான பூமி பூஜை, அடிக்கல் நாட்டு விழா நடைபெற்றது.

இதில், புதுச்சேரி நகர வளர்ச்சி ஆணையத்தின் அலுவலர்கள் முன்னிலையில், முதலமைச்சர் நாராயணசாமி, சட்டப்பேரவை உறுப்பினர் லட்சுமி நாராயணன் ஆகியோர் அடிக்கல் நாட்டிவைத்தனர்.

இரண்டாண்டுகளில் இதற்கான பணிகள் முடிக்கப்பட்டு வீடுகள் பயனாளிகளுக்கு வழங்கப்படும் எனத் தெரிவிக்கப்பட்டது.