ஆளுநர் கிரண்பேடியை கண்டித்து மருத்துவர்கள் அமைதிப்போராட்டம்!

புதுச்சேரி: மருத்துவப் பணியாளர்களை கடுமையாக திட்டிய ஆளுநர் கிரண்பேடியை கண்டித்து மருத்துவர்கள் நேற்று (ஜூன் 20) கருப்பு பேட்ஜ் அணிந்து போராட்டத்தில் ஈடுபட்டனர்.

புதுச்சேரியில் கடந்த சில தினங்களுக்கு முன்பு துணை நிலை ஆளுநர் கிரண்பேடி சுகாதாரத் துறை இயக்குநர் அலுவலகத்தில் ஆய்வு மேற்கொண்டார். அப்போது, மருத்துவர்களை கடுமையாக திட்டியதாகக் கூறப்படுகிறது. இதைத்தொடர்ந்து கிரண்பேடியின் செயலுக்கு சுகாதாரத்துறை அமைச்சர் மல்லாடி கிருஷ்ணாராவ் வருத்தம் தெரிவித்தார்.

மருத்துவப் பணியாளர்கள் உயிரைப் பணயம் வைத்து கரோனாவை எதிர்கொண்டு வருகிற நிலையில், அவர்களை துணை நிலை ஆளுநர் திட்டியது மருத்துவர்களிடையே கோபத்தை ஏற்படுத்தியது.

இந்தச் சூழ்நிலையில், துணை நிலை ஆளுநரின் செயலுக்கு கண்டனம் தெரிவிக்கும் வகையில் புதுச்சேரியிலுள்ள அனைத்து மருத்துவமனைகள், ஆரம்ப சுகாதார நிலையங்களில் பணியாற்றும் மருத்துவர்கள், மருத்துவப் பணியாளர்கள் கருப்பு பேட்ஜ் அணிந்து தங்களது பணிகளை மேற்கொண்டனர்.

இதையும் படிங்க:'அரசு ஊழியர்களை மிரட்டுவதை துணைநிலை ஆளுநர் நிறுத்திக்கொள்ள வேண்டும்' - ராஜிம்