கரோனா எதிரொலி: புதுச்சேரியில் நாராயணசாமி தலைமையில் பேரிடர் மீட்புக் கூட்டம்

புதுச்சேரி: ஒரே நாளில் 52 பேருக்கு கரோனா தொற்று உறுதியானதைத் தொடர்ந்து நாளை (ஜூன் 21) பேரிடர் மீட்புக் கூட்டத்தை புதுச்சேரி முதலமைச்சர் நாராயணசாமி கூட்டவுள்ளார்.

புதுச்சேரியில் இதுவரை இல்லாத வகையில் இன்று (ஜூலை 20) ஒரே நாளில் 52 பேருக்கு கரோனா தொற்று உறுதியாகியுள்ளது. இது, புதுச்சேரியில் கரோனா பரவல் தீவிரமடைந்து வருவதை காட்டுகிறது. இதைக் கட்டுக்குள் கொண்டுவர பேரிடர் மீட்புக் கூட்டத்தை முதலமைச்சர் நாராயணசாமி நாளை கூட்டவுள்ளார்.

இது தொடர்பாக அவர் வெளியிட்டுள்ள வீடியோவில், "புதுச்சேரியில் ஒரே நாளில் 52 பேருக்கு தொற்று உறுதியானதையடுத்து எல்லைகள் மூடப்பட்டு கண்காணிப்பு தீவிரப்படுத்தப்பட்டுள்ளன. புதுச்சேரிக்குள் வெளி மாநிலத்தவர் வந்தால் 14 நாள்கள் தங்களைத் தனிமைப்படுத்திக்கொள்ள வேண்டும் என்று உத்தரவு பிறப்பிக்கப்பட்டுள்ளது. ஆனால், சென்னையிலிருந்து புதுச்சேரி வந்தவர்கள் இதைக் கடைபிடிப்பதில்லை.

பெரும்பாலான மக்கள் தகுந்த இடைவெளியைப் பின்பற்றுவதில்லை. நாளை கூடவுள்ள பேரிடர் மீட்புக் கூட்டத்தில், தொற்றுப் பரவலைக் கட்டுப்படுத்த என்னென்ன நடவடிக்கைகள் எடுக்கப்படவேண்டும் என்பது குறித்து ஆலோசிக்கப்படவுள்ளது.

கூட்டத்தில், சில முக்கிய முடிவுகள் எடுக்கப்படவுள்ளன. மக்களைக் காப்பாற்ற சில கடுமையான நடவடிக்கைகளும், முடிவுகளும் எடுக்கப்படவுள்ளன. தமிழ்நாட்டின் பல பகுதிகளில் கடைகளின் திறப்பு நேரம் குறைக்கப்பட்டுள்ளது. மேலும், தமிழ்நாட்டிலுள்ள கடையின் உரிமையாளர்கள் தாங்களாகவே அரசை தொடர்புகொண்டு கடைகளின் திறப்பு நேரத்தை குறைத்து வருகின்றனர்.

ஆதலால், புதுச்சேரியில் கடைவைத்திருப்போர், பொதுமக்களின் நலன் கருதி கடைகளின் திறப்பு நேரத்தைக் குறைக்க முன்வரவேண்டும். கடலூர், விழுப்புரத்திலிருந்து புதுச்சேரிக்கு மக்கள் வருவதை தவிர்க்கவேண்டும்" என்று கூறியுள்ளார்.

இதையும் படிங்க:கோவிட்-19ஐ குணப்படுத்த புதிய மருந்து - இந்தியாவில் அறிமுகமானது!