வெங்கையா நாயுடு பிறந்த நாள் - பிரதமர், மத்திய உள் துறை அமைச்சர் வாழ்த்து

டெல்லி: இன்று பிறந்த நாளைக் கொண்டாடும் குடியரசு துணைத் தலைவர் வெங்கையா நாயுடுவிற்கு பிரதமர் மோடி, மத்திய உள் துறை அமைச்சர் அமித் ஷா வாழ்த்து தெரிவித்துள்ளனர்.

குடியரசு துணைத் தலைவர் வெங்கையா நாயுடு இன்று தனது 71ஆவது பிறந்த நாளைக் கொண்டாடுகிறார். அவருக்கு இன்று காலை முதலே பல்வேறு அரசியல் தலைவலர்கள் வாழ்த்து தெரிவித்துவருகின்றனர்.

இந்நிலையில் பிரதமர் நரேந்திர மோடி தனது ட்விட்டர் பக்கத்தில் குடியரசு துணைத் தலைவர் வெங்கையா நாயுடுவிற்கு வாழ்த்து தெரிவித்துள்ளார். அதில், "எங்கள் ஆற்றல்மிக்க குடியரசு துணைத் தலைவர் வெங்கையா நாயுடுவிற்கு பிறந்தநாள் வாழ்த்துகள். அவர் நீண்ட ஆரோக்கியமான வாழ்க்கை வாழட்டும்.

வெங்கையா நாயுடு அவரது குணம், அறிவாற்றல் ஆகியவற்றால் அரசியலுக்கு அப்பாற்பட்டும் பலரால் போற்றப்படுகிறார். அவர் மாநிலங்களவையின் தலைவராகவும் மிகச் சிறப்பாக செயல்பட்டுவருகிறார்" என்று குறிப்பிட்டுள்ளார்.

அதேபோல, மத்திய உள் துறை அமைச்சர் அமித் ஷா தனது ட்விட்டர் பக்கத்தில், "குடியரசு துணைத் தலைவர் வெங்கையா நாயுடுவிற்கு பிறந்த நாள் வாழ்த்துகள். நாடாளுமன்ற செயல்பாடுகள் குறித்த அவரது அறிவு, எளிமை ஆகியவற்றால் அரசியல் வேறுபாடுகளைத் தாண்டி பலராலும் மதிக்கப்படும் ஒரு அனுபவமிக்க தலைவர்.

அவரது உடல் நலனிற்காகவும் அவர் நீண்ட நாள்கள் வாழவும் பிரார்த்தனை செய்கிறேன்" என்று பதிவிட்டுள்ளார்.

ஆந்திர பிரதேசத்திலுள்ள சாவத்பாலம் என்ற ஊரில் ஜூலை 1, 1949இல் பிறந்தவர் வெங்கையா நாயுடு. இவர் 1998ஆம் ஆண்டு முதல் 2014ஆம் ஆண்டு வரை மூன்று முறை கர்நாடக மாநிலத்திலிருந்து மாநிலங்களவைக்கு தேர்ந்தெடுக்கப்பட்டுள்ளார்.

பாஜகவின் தலைவராக 2002ஆம் ஆண்டு நியமிக்கப்பட்டார். மேலும், 2014ஆம் ஆண்டு பாஜக வெற்றி பெற்று ஆட்சி அமைத்தபோது, நாடாளுமன்ற விவகாரத் துறை அமைச்சராகவும் பொறுப்போற்றார். அதைத்தொடர்ந்து 2017ஆம் ஆண்டு ஆகஸ்ட் 5ஆம் தேதி குடியரசு துணைத் தலைவராக வெங்கையா நாயுடு தேர்ந்தெடுக்கப்பட்டார்.

இதையும் படிங்க: பி.எம்.ஜி.கே.ஏ.ஒய் திட்டம் குறித்து அமித்ஷா தலைமையில் அமைச்சர்கள் கலந்தாய்வு!