உலகம் முழுவதும் பிளாஸ்டிக் கழிவுகளை மறுசுழற்சிக்கு உட்படுத்தி பயன்பாட்டிற்கு கொண்டுவருவதற்கான வழிகள் தொடர்ந்து கண்டறியப்பட்டுவரும் நிலையில், அசாம் மாநிலத்தின் மஜூலி மாவட்டத்தின் அங்கன்வாடி மையங்கள் மற்றும் கிராமப்புற குழந்தைகள் பராமரிப்பு மையத்தின் கட்டுமானப் பணிகளில் புதுவித முயற்சி ஒன்று மேற்கொள்ளப்பட்டு வருகிறது.
மஜூலி மாவட்டத் துணை ஆணையர் பிக்ரம் கைரி யால் தொடங்கப்பட்ட 'கிஷாலயா' எனும் இந்தத் திட்டத்தின் ஒரு பகுதியாக, அம்மாவட்ட நிர்வாகம் 100 அங்கன்வாடி மையங்களைத் தேர்வு செய்து, செங்கற்களுக்கு பதிலாக ஒருமுறை பயன்படுத்தப்படும் பிளாஸ்டிக் குப்பிகளை உபயோகித்து கட்டுமானங்கள் எழுப்பவுள்ளது.
”இந்தத் திட்டம் குறித்து நான் மகிழ்ச்சியாக உணருகிறேன். அசாமில் இத்தகைய கட்டுமானத் திட்டத்தின்கீழ் இது முதல் முயற்சி என்றாலும், முன்னதாக இதே தொழில்நுட்பத்தைப் பயன்படுத்தி மார்கெரிட்டாவில் ஜெனரேட்டர்கள் வைப்பதற்காகக் கொட்டகை ஒன்றை நாங்கள் எழுப்பியிருந்தோம். இந்த கொட்டகை இன்னும் அப்படியே நல்ல நிலையில் உள்ளது” என அம்மாவட்ட துணை ஆணையர் கைரி தெரிவித்துள்ளார்.
தொடர்ந்து பேசிய அவர், ”இதுபோன்ற கட்டுமானங்கள் ஃபிலிப்பைன்ஸ், ஆப்பிரிக்க நாடுகள் மற்றும் தென் அமெரிக்க நாடுகளில் எழுப்பட்டுள்ளதை நாம் இதற்குமுன் கண்டுள்ளோம். இந்தியாவில், கர்நாடகாவும், பிற தென்னிந்திய மாநிலங்களும் இந்தத் தொழில்நுட்பத்தை முன்னதாக பயன்படுத்தியுள்ளன. எனவே அசாமிலும் இந்த முயற்சியை மேற்கொள்ள முயன்று, மஜூலியில் இந்த வேலைகளைத் தொடங்கினோம். தற்போது நாங்கள் 20,000 பாட்டில்களைப் பயன்படுத்தவுள்ளோம்” என்றும் தெரிவித்தார்.
உலகின் மிகப்பெரிய ஆற்றுத்தீவுப் பகுதியான, ககோரிகோட்டா பபனா கிராமத்திலுள்ள, சிலகலா காவ் பஞ்சாயத்தின் கீழ், 80,000 ரூபாய் செலவில் இந்தத் திட்டத்தின் மூலம் முதல் அங்கன்வாடி மையமானது அமைக்கப்படவுள்ளது. கடந்த டிசம்பர் 25, 2019 இதற்கான அடிக்கல் நாட்டப்பட்டது.