குடும்பத்துக்கு இரு குழந்தைகள் என்ற கொள்கையைக் கட்டாயமாக்கலாம் என்று ஆர்எஸ்எஸ் தலைவர் மோகன் பகவத் சமீபத்தில் கருத்து தெரிவித்திருந்தார். அவரின் கருத்துக்கு பலரும் கண்டனங்களைத் தெரிவித்துவருகின்றனர்.
இந்நிலையில், நிசாமாபாத்தில் நடைபெற்ற உள்ளாட்சித் தேர்தல் பரப்புரையில் பேசிய ஹைதராராபாத் மக்களவை உறுப்பினரும் ஏ.ஐ.எம்.ஐ.எம்(AIMIM) கட்சித் தலைவருமான ஒவைசி, "ஆர்எஸ்எஸ் தலைவர் மோகன் பகவத் ‘இரு குழந்தை’ கொள்கை குறித்துப் பேசுகிறார். கடந்த ஐந்தரை ஆண்டுகளாக பாஜக அரசு வேலைவாய்ப்பை வழங்கவில்லை. இப்போது அவர்கள் இரு குழந்தை கொள்கை குறித்து பேசுகின்றனர்.
நாட்டின் 60 விழுக்காட்டினர் 40 வயதுக்கு கீழான இளைஞர்கள். அவர்களுக்கு வேலைவாய்பை ஏற்படுத்த மோடி அரசினால் முடியவில்லை. 2018ஆம் ஆண்டு மட்டும் நாள்தோறும் 36 இளைஞர்கள் வேலைவாய்ப்பின்மை காரணமாகத் தற்கொலை செய்துகொண்டனர். இரு குழந்தைகள் கொள்கை பற்றி பேசும் நீங்கள் 36 குழந்தைகள் பலியானதை தடுக்கத் தவறிவிட்டீர்கள். உங்களுக்கு வெட்கமாக இல்லையா?