அயோத்திக்கு வருகை தரும் மோடி - பாதுகாப்புப் பணிகள் தீவிரம்

லக்னோ: அயோத்தியில் ராமர் கோயில் அடிக்கல் நாட்டு விழாவுக்கு பிரதமர் நரேந்திர மோடி வருகைத் தர உள்ளதைத் தொடர்ந்து, அங்கு பாதுகாப்புப் பணிகளில் 3,500க்கும் மேற்பட்ட காவலர்கள் ஈடுபட்டுள்ளனர்.

உத்தரப் பிரதேச மாநிலம் அயோத்தியில் கட்டப்படவுள்ள ராமர் கோயிலுக்கு வரும் ஆகஸ்ட் 5ஆம் தேதி அடிக்கல் நாட்டு விழாவும், பூமி பூஜையும் நடைபெறவுள்ளது. இந்நிகழ்ச்சியில் பிரதமர் மோடி கலந்துகொள்ள உள்ளார்.

அயோத்தியில் நடைபெறும் பூமி பூஜையை சீர்குலைக்க பயங்கரவாத குழுக்கள் முயற்சிப்பதாக, ஏற்கனவே மத்திய புலனாய்வு அமைப்புகள் மாநில காவல் துறையினருக்கு எச்சரிக்கை விடுத்துள்ளனர். இதன் காரணமாக அங்கு வரலாறு காணாத பாதுகாப்பு ஏற்பாடுகள் மேற்கொள்ளப்பட்டுள்ளன. இந்த பாதுகாப்பு ஏற்பாடுகள் வரும் ஆகஸ்ட் 15ஆம் தேதி வரை தொடரும் என்றும் அறிவிக்கப்பட்டுள்ளது.

பிரதமர் நரேந்திர மோடியைத் தவிர, பாஜகவின் முக்கிய தலைவர்கள் எல்.கே. அத்வானி, முரளி மனோகர் ஜோஷி, உமா பாரதி, ஆர்எஸ்எஸ் தலைவர் மோகன் பகவத் உள்ளிட்ட பல தலைவர்களும் இந்த நிகழ்ச்சியில் கலந்து கொள்வார்கள் என்று எதிர்பார்க்கப்படுகிறது. மேலும், நாட்டிலுள்ள முக்கிய தொழிலதிபர்களும் இதில் கலந்துகொள்ள இருக்கின்றனர்.

பிரதமர் மோடி தரையிறங்கவுள்ள சாகேத் மகாவித்யாலயா பகுதியிலிருந்து, ராமர் கோயில் கட்டப்படும் இடம் வரையிலான பகுதியில் ஏற்கனவே பாதுகாப்பு பல மடங்கு அதிகரிக்கப்பட்டுள்ளது. மேலும், அப்பகுதியில் வசிப்பவர்களுக்கு பாஸ்களும் வழங்கப்பட்டுள்ளன.

பாதுகாப்புப் பணிகள் குறித்து செய்தியாளர்களிடம் பேசிய மூத்த பாதுகாப்பு அலுவலர், "3,500க்கும் மேற்பட்ட காவலர்கள் பாதுகாப்புப் பணியில் ஈடுபடுத்தப்பட்டுள்ளனர். அதேபோல், கண்காணிப்பு பணிகளை மேற்கொள்ள ஏதுவாக 500க்கும் மேற்பட்ட ட்ரோன் விமானங்களும், 5,000 க்கும் மேற்பட்ட சிசிடிவி கேமராக்களும் நிறுவப்பட்டுள்ளன" என்றார்.

இதையும் படிங்க:'மோடி நாடகத்தை முடிக்க வேண்டும்’ - அசோக் கெலாட்