புதுவையில் அமைச்சர்கள் யாருக்கும் கரோனா தொற்று இல்லை

புதுச்சேரி: முதலமைச்சர், அமைச்சர்களுக்கு எடுக்கப்பட்ட கரோனா பரிசோதனை முடிவுகளில் யாருக்கும் கரோனா தொற்று உறுதி செய்யப்படவில்லை என சுகாதாரத்துறை இயக்குனர் மோகன் குமார் தெரிவித்தார்.

புதுச்சேரி மாநிலத்தில் கரோனா வைரஸ் தடுப்பு நடவடிக்கைகள், அரசு நலத்திட்டங்களை மக்களிடம் நேரடியாக சேர்ப்பதற்காக சட்டப்பேரவை உறுப்பினர்கள் மக்களை சந்தித்துவருகின்றனர். அவர்களில் யாரேனும் கரோனா நோய் தொற்றினால் பாதிக்கப்பட்டுள்ளனரா என்பதைக் கண்டறிய சட்டப்பேரவை கமிட்டி அறையில் சிறப்பு பரிசோதனை முகாம் அமைக்கப்பட்டு முதலமைச்சர், அமைச்சர்கள், சட்டப்பேரவை உறுப்பினர்களுக்கு பரிசோதனை மேற்கொள்ளப்பட்டது.

இதுகுறித்து செய்தியாளர்களிடம் பேசிய புதுச்சேரி சுகாதாரத்துறை இயக்குனர் மோகன் குமார், முதலமைச்சர், அமைச்சர்கள், சட்டப்பேரவை உறுப்பினர்களுக்கு நேற்று நடைபெற்ற கரோனா நோய் குறித்த பரிசோதனையின் முடிவுகளில் யாருக்கும் நோய் அறிகுறி தென்படவில்லை எனக் கூறினார்.

புதுச்சேரி கதிர்காமம் அரசு மருத்துவமனையில் உள்ள கரோனா பரிசோதனை மையத்தின் மூலம் நாளொன்றுக்கு 50 நபர்களுக்கு பரிசோதனை செய்யும் வசதி ஏற்படுத்தப்பட்டுள்ளதாகக் கூறிய அவர், மத்திய பிரதேசத்தில் ஆயிரத்து 500 பேருக்கு எடுக்கப்பட்ட உழிழ்நீர், ரத்த மாதிரிகளை பரிசோதனை செய்து தருமாறு மத்திய அரசு அறிவுறுத்தியுள்ளது. தற்போது அவை ஜிப்மர் மருத்துவமனைக்கு அனுப்பி வைக்கப்பட்டுள்ளதாகத் தெரிவித்தார்.

இதையும் படிங்க: புதுவையில் இதுவரை சுமார் 10 லட்சம் பேருக்கு கரோனா கண்டறிதல் சோதனை!