பிரணாப் உடல் நிலையில் எந்த முன்னேற்றமும் இல்லை - ராணுவ மருத்துவமனை!

டெல்லி: முன்னாள் குடியரசுத் தலைவர் பிரணாப் முகர்ஜியின் உடல் நிலையில் எந்தவித முன்னேற்றமும் ஏற்படவில்லை என ராணுவ மருத்துவமனை நிர்வாகம் தெரிவித்துள்ளது.

முன்னாள் குடியரசுத் தலைவர் பிரணாப் முகர்ஜிக்கு (84) கடந்த 10ஆம் தேதி திடீர் உடல் நலக்குறைவு ஏற்பட்டது. இதையடுத்து, அவர் டெல்லி கான்ட் பகுதியிலுள்ள ராணுவ ஆராய்ச்சி மருத்துவமனையில் அனுமதிக்கப்பட்டார். அங்கு அவருக்கு மூளையில் அறுவை சிகிச்சை மேற்கொள்ளப்பட்டது.

இதைத்தொடர்ந்து அவருக்குத் தொடர்ந்து மருத்துவம் அளிக்கப்பட்டது. மேலும், பிரணாப் முகர்ஜிக்கு கரோனா தீநுண்மி தொற்று இருப்பது உறுதியானது. இதனால் அவருக்கு செயற்கை சுவாசக் கருவி உதவியுடன் மருத்துவம் அளிக்கப்பட்டு வருகிறது. அதுமட்டுமின்றி, பிரணாப் கோமா நிலையில் உள்ளார்.

இந்நிலையில், இன்று (ஆக.26) இது குறித்து அறிக்கை வெளியிட்டுள்ள ராணுவ மருத்துவமனை நிர்வாகம், 'பிரணாப் முகர்ஜியின் உடல்நிலையில் எந்த மாற்றமும் இல்லை. அதனால் தொடர்ந்து அவருக்கு வென்டிலேட்டர் உதவியுடன் சிகிச்சை அளிக்கப்பட்டு வருகிறது. அவரின் முக்கிய உடற்பாகங்கள் சீராக செயல்படுகின்றன' எனக் குறிப்பிட்டுள்ளார்.

இதையும் படிங்க...ஸ்டெர்லைட் நிர்வாகம் ஆலையை திறக்க உச்ச நீதிமன்றத்தில் மனு!