அடுத்த தனியார் ரயில்... இந்த ரூட்டில்தான்!

டெல்லி: இந்தூர் - வாரணாசி இடையேயான வழித்தடத்தில் அடுத்த தனியார் ரயில் இயக்கப்படும் என்று இந்திய ரயில்வே சார்பில் அறிவிக்கப்பட்டுள்ளது.

இந்திய ரயில்வே துறையில் தனியார் ரயில்கள் இயக்குவது தொடர்பான முடிவுகள் கடந்தாண்டு எடுக்கப்பட்டது. அதன்படி அக்டோபர் 2019ஆம் ஆண்டு டெல்லி - லக்னோ இடையே முதலாவது தனியார் ரயில் இயக்கப்பட்டது. அதைத்தொடர்ந்து மும்பை - அகமதாபாத் இடையே ஜனவரி 2019ஆம் ஆண்டு, தனியார் ரயில் இயக்கப்பட்டது.

இவ்விரு வழித்தடங்களில் இயங்கும் தேஜாஸ் ரயில், ஐ.ஆர்.சி.டி.சி. (IRCTC)-ஆல் இயக்கப்படுகிறது. தனியார் ரயிலுக்கு மக்களிடையே நல்ல வரவேற்பு கிடைத்துள்ளதால், மூன்றாவதாக எந்த வழித்தடத்தில் தனியார் ரயில் இயக்கப்படும் என்ற எதிர்பார்ப்பு மக்களிடையே நிலவியது.

இந்நிலையில், நேற்று மாலை செய்தியாளர்களைச் சந்தித்த ரயில்வே வாரியத்தின் தலைவர் வி.கே.யாதவ், இந்தூர் - வாரணாசி இடையேயான வழித்தடத்தில் தனியார் ரயில் இயக்கப்படும் என்றும் இந்த ரயிலும்; ஐ.ஆர்.சி.டி.சி. (IRCTC)-ஆல் இயக்கப்படும் என்றும் அறிவித்தார். வரும் பிப்ரவரி மாதம் 20ஆம் தேதி முதல் இந்த ரயில் இயக்கப்படும் என்றும் எதிர்பார்க்கப்படுகிறது.

நிதியமைச்சர் நிர்மலா சீதாராமன் மத்திய பட்ஜெட்டை தாக்கல் செய்து சில மணி நேரத்தில் இந்த அறிவிப்பு வெளியாகியுள்ளது.

இதையும் படிங்க: இந்தியர்களை மீட்க புறப்படும் ஏர் இந்தியா!