தேசிய தகுதி மற்றும் நுழைவுத் தேர்வு (நீட்) திட்டமிடப்படுவதற்கு சில நாட்களுக்கு முன்பு நேற்று (ஆகஸ்ட் 19) 19 வயது மாணவி தற்கொலை செய்து கொண்டதாகக் கூறப்படுகிறது. கடந்த 2016ஆம் ஆண்டு முதல் நாடு முழுவதுமுள்ள அரசு அல்லது தனியார் மருத்துவ மற்றும் பல் கல்லூரிகளில் இளங்கலை மருத்துவ படிப்புகள் மற்றும் பல் படிப்புகளைப் படிக்க விரும்பும் மாணவர்களுக்கு அகில இந்திய அளவிலான தேசிய தகுதி மற்றும் நுழைவுத் தேர்வு நடத்தப்பட்டு வருகிறது.
நாடு முழுவதும் நடப்பப்படும் இந்த நுழைவுத் தேர்வை கல்வி ஆர்வலர்கள் கடுமையாக எதிர்த்து வருகின்றனர். ஆண்டுதோறும் இந்த தேர்வின் காரணமாக மாணவ மாணவிகள் பெரும் மன உளைச்சலுக்கு உள்ளாகி வருகின்றனர். அந்த வகையில், ஆந்திரப் பிரதேச மாநிலம் விஜயவாடாவைச் சேர்ந்த மாணவி ஒருவர் கடந்த இரண்டு ஆண்டுகளாக நீட் தேர்வுக்காக தனியார் நிறுவனம் ஒன்றில் பயிற்சி மேற்கொண்டு வந்ததாக அறிய முடிகிறது.
இதனிடையே, கரோனா நெருக்கடிக்கு மத்தியில் இந்தாண்டும் நீட் தேர்வு திட்டமிட்டப்படி செப்டம்பர் 13ஆம் தேதி நடைபெறும் என உச்ச நீதிமன்றம் அறிவித்ததை அடுத்து அம்மாணவி தேர்வை எதிர்கொள்ள வேண்டியுள்ளதை உணர்ந்து கடும் அழுத்தத்திற்கு உள்ளாகி இருந்துள்ளார். இதனையடுத்து, அவர் நேற்று தற்கொலை செய்துகொண்டார்.
அவரது தந்தை அளித்த புகாரின் பேரில் விஜயவாடா காவல் துறையினர், உயிரிழந்த மாணவியின் உடலைக் கைப்பற்றி உடற்கூறாய்விற்காக அரசு மருத்துவமனைக்கு அனுப்பி வைத்தனர். மேலும் மாணவி தற்கொலை குறித்து வழக்குப் பதிவு செய்து விசாரணை நடத்தி வருகின்றனர். அதேபோல, தமிழ்நாட்டின் கோவை ஆர்.எஸ் புரம் வெங்கடசாமி சாலை கிழக்குப் பகுதியைச் சேர்ந்த மாணவி சுபஸ்ரீ (19) நேற்று மாலை அவரது வீட்டில் தூக்கிட்டு தற்கொலை செய்து கொண்டது கவனிக்கத்தக்கது.
கடந்த 2016ஆம் ஆண்டு நீட் தேர்வில் தோல்வியடைந்த மாணவி அனிதா தற்கொலை செய்துகொண்ட சம்பவம் நாடு முழுவதும் பெரும் அதிர்ச்சியை ஏற்படுத்தியது. மேலும் 2019ஆம் ஆண்டு மோனிஷா, ரித்துஸ்ரீ, வைஷியா ஆகிய மாணவிகளும் நீட் தேர்வில் தோல்வியடைந்ததால் தற்கொலை செய்தனர் என்பது குறிப்பிடத்தக்கது.
