இந்தியா முழுவதும் கரோனா பெருந்தொற்றைத் தடுக்கும் வகையில், பலகட்டமாக ஊரடங்கு உத்தரவு அமல்படுத்தப்பட்டது. இதனால் வாழ்வாதாரமின்றித் தவிக்கும் இடம்பெயர்ந்த தொழிலாளர்கள் சொந்த ஊர்களுக்குத் திரும்பிக் கொண்டிருக்கின்றனர். போதிய பண வசதியில்லாமல் ஏராளமானோர் நடந்தே செல்கின்றனர்.
இந்த நடைபயணத்தில் உடல்நலக் கோளாறு, விபத்துகள் மூலம் பலர் உயிரிழக்க நேரிடுகிறது. நேற்று முன் தினம் ராஜஸ்தானிலிருந்து உத்தரப்பிரதேசம் சென்ற லாரி எதிரே வந்தவர்கள் மீது மோதி விபத்துக்குள்ளானதில், 24 புலம்பெயர் தொழிலாளர்கள் உயிரிழந்தனர். இந்நிலையில், மீண்டும் தொழிலாளிகள் டெல்லி, உத்தரப் பிரதேச எல்லையில் கூடியிருப்பது அச்சமூட்டுகிறது.