'குடிபெயர்ந்த தொழிலாளர்களின் பாதுகாப்பை மாநிலங்கள் உறுதிசெய்ய வேண்டும்' - உள்துறை அமைச்சகம்

டெல்லி: குடிபெயர்ந்த தொழிலாளர்களுக்கு உணவளித்து, அவர்கள் எங்கேனும் நடந்து செல்வதைக் கண்டால், அவர்கள் பயணங்களுக்குத் தக்க ஏற்பாடு சேய்ய நடவடிக்கை எடுக்கப்பட வேண்டும் என்று உள்துறை அமைச்சகம் மாநில அரசுகளுக்குக் கடிதம் அனுப்பியுள்ளது.

இதுகுறித்து அனைத்து மாநில தலைமைச் செயலர்களுக்கும் கடிதம் எழுதியுள்ள உள்துறைச் செயலர் அஜய் பல்லா, ”சாலைகளிலும் ரயில் நிலையங்களிலும் பல்லாயிரக்கணக்கான தொழிலாளர்கள் நடமாடுவதால் அவர்களுக்கு உரிய முறையில் ஆலோசனைகள் வழங்க வேண்டும்.

பேருந்துகளையும், ரயில்களையும் இயக்க அனுமதி அளிக்கப்பட்டுள்ளதால், நடந்துசெல்ல வேண்டிய அவசியம் இல்லை என அவர்களுக்கு விளக்க வேண்டும். அவர்களின் பயணங்களுக்கு மாநில அரசுகள் சிறப்பு வசதிகள் செய்துதர வேண்டும்.

உள்துறை அமைச்சகத்தின் கடிதம்

நடந்து செல்வோரை அருகிலுள்ள அரசு முகாம்களுக்கு அழைத்துச் சென்று உணவு, குடிநீர், மருத்துவ வசதிகளைச் செய்துதர வேண்டும்” என்று குறிப்பிடப்பட்டுள்ளது.