டெல்லி சட்டப்பேரவைத் தேர்தல் பிப்ரவரி எட்டாம் தேதி நடைபெறும் என தேர்தல் ஆணையம் அறிவித்திருந்தது. மேலும் வாக்கு எண்ணிக்கை பிப்ரவரி 11ஆம் தேதி நடைபெறும் என்றும் வேட்புமனு தாக்கல் செய்ய கடைசி நாளாக ஜனவரி 21ஆம் தேதி என்றும் அறிவிக்கப்பட்டது.
தேர்தல் அறிவிக்கப்பட்ட நாளிலிருந்து ஆம் ஆத்மி, பாஜக, காங்கிரஸ் உள்ளிட்ட கட்சிகள் களத்தில் இறங்கி தீவிரமாகச் செயல்பட்டுவருகின்றன. காங்கிரஸ் கட்சி நேற்று வேட்பாளர் பட்டியலை வெளியிட்டிருந்தது. அப்பட்டியலில், அரவிந்த் கெஜ்ரிவாலை எதிர்த்துப் போட்டியிடும் வேட்பாளரின் பெயரை மட்டும் அறிவிக்கவில்லை.
இந்நிலையில், டெல்லியில் முதலமைச்சரும், ஆம் ஆத்மி கட்சித் தலைவருமான அரவிந்த் கெஜ்ரிவால் இன்று வேட்புமனு தாக்கல் செய்கிறார். மேலும் அவர் சாலையில் ஊர்வலமாகச் சென்று வேட்புமனு தாக்கல் செய்யவுள்ளதாகவும் கூறப்படுகிறது. இந்த ஊர்வலம் வால்மீகி கோயிலில் தொடங்கி ஹனுமன் கோயிலில் முடிவடைகிறது.