இந்தியாவில் தொடர்ந்து குறையும் கரோனாவின் தாக்கம்!

டெல்லி: இந்தியாவில் கரோனாவின் தாக்கம் தொடர்ந்து குறைந்து வரும் நிலையில், தற்போது கரோனா காரணமாக சிகிச்சை பெற்று வருவோரின் எண்ணிக்கை ஆறு லட்சமாக குறைந்துள்ளது.

சீனாவின் வூஹான் நகரில் கடந்தாண்டு இறுதியில் பரவத் தொடங்கியது, கரோனா வைரஸ். இந்த வைரஸ் சீனாவில் குறைந்திருந்த நிலையில், தற்போது மற்ற நாடுகளிலும் குறைந்து வருகிறது. கடந்த ஜனவரி மாதத்திலிருந்து நாள்தோறும் ஆயிரக்கணக்கானோர் உயிரிழந்து வந்தனர். குறிப்பாக இந்தியா கரோனா தொற்றால் கடுமையாக பாதிக்கப்பட்டது.

அரம்பத்தில் இந்தியாவில் தொடர்ச்சியாக அதிகரித்து வரும் கரோனா தொற்று செப்டம்பர் மாதத்துக்கு பிறகு குறைய தொடங்கியுள்ளது. தொடர்ந்து மூன்றாவது நாளாக, கரோனா காரணமாக சிகிச்சை பெற்று வருவோரின் எண்ணிக்கை ஆறு லட்சத்திற்கு கீழே சென்றுள்ளது. மொத்தமாக, கரோனா காரணமாக சிகிச்சை பெற்று வருவோரின் எண்ணிக்கை 5,70,458ஆக குறைந்துள்ளது.

பல்வேறு மாநிலங்கள், யூனியன் பிரதேசங்கள் மேற்கொண்ட துரித நடவடிக்கையினால் கரோனாவின் தாக்கம் குறைந்துள்ளதாக மத்திய சுகாதாரத்துறை அமைச்சகம் தெரிவித்துள்ளது. கர்நாடகாவிலும் கடந்த 24 மணி நேரத்தில் கரோனாவால் சிகிச்சை பெற்றுவரும் எண்ணிக்கை குறைந்துள்ளது. 10 லட்சம் பேரில் கரோனாவால் பாதிக்கப்பட்டோரின் சராசரி 5,930ஆக உள்ளது.

கடந்த 24 மணிநேரத்தில், 470 பேர் கரோனா காரணமாக உயிரிழந்தனர். 10 லட்சம் பேரில் கரோனாவால் உயிரிழந்தோரின் சராசரி 88ஆக உள்ளது.