கரோனா பாதிப்பில் ரஷ்யாவைப் பின்னுக்குத் தள்ளி 3ஆவது இடத்தில் இந்தியா!

உலகில் கோவிட் 19 தொற்று அதிகம் பாதிக்கப்பட்ட நாடுகளின் பட்டியலில் அமெரிக்கா, பிரேசிலுக்கு அடுத்தப்படியாக இந்தியா மூன்றாவது இடத்தில் உள்ளது.

உலகளவில் கடந்த 24 மணிநேரத்தில் 2 லட்சத்து 12 ஆயிரம் பேருக்குக் கரோனா தொற்று உறுதி செய்யப்பட்டதையடுத்து, மொத்த பாதிப்பு ஒரு கோடியே 14 லட்சமாக அதிகரித்துள்ளது. குறிப்பாக, இந்தியாவில் கரோனாவின் தாக்கம் நாளுக்கு நாள் உச்சத்தைத் தொட்டுவருகிறது. நேற்று ஒரே நாளில் இதுவரை இல்லாத வகையில் 25 ஆயிரம் பேருக்குக் கரோனா தொற்று உறுதிசெய்யப்பட்டுள்ளது.

இதில், மகாராஷ்டிரா, டெல்லி, தமிழ்நாடு, குஜராத், உத்தரப் பிரதேசம், தெலங்கானா, கர்நாடகா ஆகிய ஏழு மாநிலங்களில் மட்டும் கரோனா பாதிப்பு 19 ஆயிரத்தைத் தொட்டுள்ளது. இந்தியாவில் இதுவரை 6 லட்சத்து 90 ஆயிரத்து 349 பேர் பாதிக்கப்பட்டுள்ள நிலையில், 19 ஆயித்து 683 பேர் உயிரிழந்துள்ளதாக மத்திய சுகாதாரத் துறை அமைச்சகம் தெரிவித்துள்ளது. இதன்மூலம் ரஷ்யாவின் பாதிப்பு எண்ணிக்கையைத் தாண்டிய இந்தியா, அதிகம் பாதிக்கப்பட்ட நாடுகளின் பட்டியலில் உலகளவில் மூன்றாவது இடத்திற்குச் சென்றுள்ளது.

ரஷ்யாவில் 6 லட்சத்து 81 ஆயிரத்து 251 பேரும், பிரேசிலில் 15 லட்சத்து 78 ஆயிரத்து 376 பேரும், அமெரிக்காவில் 29 லட்சத்து 54 ஆயிரத்து 999 பேரும் பாதிக்கப்பட்டுள்ளதாக உலகச் சுகாதார அமைப்பு தெரிவித்துள்ளது. இந்தியாவில், கடந்த 24 மணி நேரத்தில் 14 ஆயிரத்து 856 பேர் கோவிட் 19 தொற்றிலிருந்து குணமடைந்துள்ளனர். மொத்தம் 4 லட்சத்து 9 ஆயிரத்து 82 பேர் குணமடைந்துள்ளனர்.

இதன்மூலம் குணமடைந்தோரின் விகிதம் 60.77 விழுக்காடாக உயர்ந்துள்ளது. தற்போதைய நிலவரப்படி, 2 லட்சத்து 44 ஆயிரத்து 814 பேர் மருத்துவக் கண்காணிப்பில் உள்ளனர்.

இதையும் படிங்க:வேலூரில் ஒரே நாளில் 166 பேருக்கு கரோனா!