பிரம்மோஸ் சூப்பர்சோனிக் ஏவுகணையின் இரண்டாம்கட்ட சோதனை வெற்றி

புவனேஷ்வர் : 400 கிமீ தூரம் பயணித்து வெற்றிகரமாக இலக்கைத் தாக்கும் பிரம்மோஸ் சூப்பர்சோனிக் ஏவுகணையின் இரண்டாம்கட்ட சோதனை வெற்றிகரமாக நிகழ்த்தப்பட்டுள்ளது.

பிரம்மோஸ் சூப்பர்சோனிக் ஏவுகணைகள் தரை, கப்பல் மற்றும் ஆகாய மார்க்கமாக எதிரிகளின் இலக்குகளை தாக்கி அழிக்க வல்லவை. இந்திய - ரஷ்ய கூட்டுத் தயாரிப்பான இந்த பிரம்மோஸ் சூப்பர்சோனிக் ஏவுகணையின் இரண்டாம்கட்ட சோதனை, ஒடிசா மாநிலம் பாலசூர் கடற்கரையில் வெற்றிகரமாக நிகழ்த்தப்பட்டது.

நீண்ட தூரம் பயணித்து இலக்கை வெற்றிகரமாகத் தாக்கும் வகையில் விஞ்ஞானிகள் இந்த ஏழுகணைகளை வடிவமைத்துள்ளனர். இந்த ஏவுகணை சுமார் 400 கிமீ பயணம் செய்து தாக்கும் தன்மை கொண்டது. பாதுகாப்பு ஆராய்ச்சி மற்றும் மேம்பாட்டு அமைப்பின் பிஜே -10 திட்டத்தின் கீழ் இந்தச் சோதனைகள் மேற்கொள்ளப்பட்டன. முன்னதாக, பிரம்மோஸ் ஏவுகணையின் முதல் சோதனை கடந்த 2017ஆம் ஆண்டு மார்ச் மாதம் நடத்தப்பட்டது.

மேலும், ஏவுகணை சோதனையில் வெற்றிபெற்ற விஞ்ஞானிகள் குழுவை வாழ்த்தி, DRDO தலைவர் டாக்டர்.ஜி.சதீஷ் ரெட்டி, "இது சூப்பர்சோனிக் க்ரூஸ் ஏவுகணையில் அதிக உள்நாட்டு உள்ளடக்கத்தை சேர்க்க வழிவகுக்கும்" எனத் தெரிவித்தார்.

அது மட்டுமின்றி, முழுக்க முழுக்க உள்நாட்டு மூலப்பொருளைக் கொண்டு தயாரிக்கப்பட்ட பிரம்மோஸ் சூப்பர்சோனிக் ஏவுகணையின் சோதனை வெற்றிக்கு, பாதுகாப்புத் துறை அமைச்சர் ராஜ்நாத் சிங் வாழ்த்து தெரிவித்துள்ளார்.