பட்டினியால் வாடும் இந்தியா - உலக பட்டினி அட்டவணை வெளியிட்ட அதிர்ச்சி தகவல்

நிகழாண்டுக்கான (2020) Global Hunger Index எனப்படும் உலகளாவிய பட்டினி அட்டவணை வெளியானது. இதில் 107 நாடுகளில் இந்தியா 94ஆவது இடத்தை பிடித்துள்ளது.

உலகளாவிய பட்டினி அட்டவணை (Global Hunger Index-GHI) 2020இல் 107 நாடுகளில் இந்தியா 94ஆவது இடத்தை பிடித்திருப்பது அதிர்ச்சியளிக்கிறது. கடந்த ஆண்டு வெளியான அட்டவணையில் 117 நாடுகளில் இந்தியா 102ஆவது இடத்தை பிடித்திருந்தது.

இந்த GHI 2020இல் இந்தியாவை பின்னுக்குத்தள்ளி வங்கதேசம், மியான்மர், பாக்கிஸ்தான் 75,78,88 ஆகிய இடங்களில் உள்ளன. இதற்கு சரியான கண்காணிப்பு இல்லாமை, ஊட்டச்சத்து குறைபாட்டை கையாள்வதில் கவனமின்மை, பெரிய மாநிலங்களின் குறைவான செயல்திறன் ஆகியவற்றை காரணமாக நிபுணர்கள் கூறுகின்றனர்.

அண்டை நாடுகளான நேபாளம் 73ஆவது இடத்திலும், இலங்கை 64ஆவது இடத்திலும் இருக்கின்றன. இதனால் இவை தீவிரமான பட்டினி பிரிவில் இல்லாமல் மிதமான பட்டினி பிரிவில் உள்ளன.

சீனா, பெலாரஸ், உக்ரைன், டர்க்கி, கியூபா, குவைத் போன்ற 17 நாடுகள் இந்த அட்டவணையில் முன்னிலை வகிக்கின்றன.

பட்டினியால் வாடும் குழந்தைகள்

இந்த GHI வெளியிட்ட அறிக்கையின்படி, 14 விழுக்காடு மக்கள் ஊட்டச்சத்து குறைபாடு உடையவர்களாக இருக்கின்றனர். சுமார் 130 கோடிக்கும் மேல் மக்கள் வசிக்கும் நாட்டில் 14 விழுக்காடு என்பது எவ்வளவு பெரிய தொகை என்பதை நீங்களே ஊகித்துக்கொள்ளுங்கள்.

இந்தியாவில் தங்களது வயதுக்கு குறைவான உயரத்தில் (stunting rate) 5 வயதுக்குட்பட்ட குழந்தைகள் 37.4 விழுக்காடு உள்ளனர். இது அவர்களின் நாள்பட்ட ஊட்டச்சத்து குறைபாட்டை உணர்த்துகிறது. தங்களது உயரத்துக்கு நிகரான எடையுடன் (wasting rate) இல்லாமல் இருக்கும் 5 வயதுக்குட்பட்ட குழந்தைகள் 17.3 விழுக்காடு உள்ளனர். 3.7 விழுக்காடு குழந்தைகள் (5 வயதுக்கு கீழ்) இறந்துவிடுவதாக இந்த அட்டவணை குறிப்பிடுகிறது.

வறுமையான இடங்களிலும், கிராமப்புறங்களிலும் குறைமாத பிரசவம், குறைந்த எடை ஆகிய காரணிகளால் குழந்தைகள் இறக்கின்றனர் என்று தெரிவிக்கப்பட்டுள்ளது.

குழந்தைகள் பிறப்பதற்கு முன்னரே சரியான கவனம், போதுமான ஊட்டச்சத்து ஆகியவற்றால் குழந்தைகள் இறப்பதை தவிர்க்கமுடியும். மேலும் ரத்தசோகை, புகையிலை பயன்பாட்டை கட்டுப்படுத்த வேண்டும்.

இந்தியாவில் மக்கள்தொகையில் அதிகம் இருக்கும் மாநிலங்களான உத்தரப் பிரதேசத்திலும், பிகாரிலும் ஊட்டச்சத்து குறைப்பாடு வெகுவாகக் காணப்படுகிறது. இது ஒட்டுமொத்த நாட்டின் பட்டினி விகிதத்தை உயர்த்தும் காரணிகளில் ஒன்று. இதன் காரணமாக உத்தரப் பிரதேசம், பிகார், மத்தியப் பிரதேசம் போன்ற மாநிலங்களை நாம் கவனத்தில் கொள்ள வேண்டும். இங்கு இருக்கும் குழந்தைகளின் ஊட்டச்சத்தை குறித்தும் கவனத்தில் எடுத்துக்கொள்ள வேண்டும்.

ஊட்டச்சத்து குறைபாடு, உயரத்துக்கு நிகரான எடை, வயதுக்கு நிகரான உயரம், குழந்தை இறப்பு விகிதம் ஆகிய நான்கு காரணிகளை வைத்து உலக பட்டினி அட்டவணை நிர்ணயிக்கப்படுகிறது.

நாட்டின் பாதுகாப்பு, தொழில்நுட்பம் போன்றவற்றில் கவனம் செலுத்திவரும் அரசு இதன்பிறகாவது மக்களின் பட்டினியையும் கருத்தில்கொள்ளுமா என்பதை பொருத்திருந்துதான் பார்க்க வேண்டும்.

இதையும் படிங்க... #GHI பாகிஸ்தானைவிட மோசமான நிலையில் இந்தியா! - அதிர்ச்சியளிக்கும் தகவல்