மதச்சார்பற்ற நாடாக இந்தியா திகழ்வதற்கு இந்துக்களே காரணம் - மத்திய அமைச்சர்

டெல்லி: மதச்சார்பற்ற நாடாக இந்தியா திகழ்வதற்கு இந்துக்களே காரணம் என மத்திய அமைச்சர் முக்தர் அப்பாஸ் நக்வி தெரிவித்துள்ளார்.

சிறுபான்மையினர் உரிமைகள் தினத்தை முன்னிட்டு தேசிய சிறுபான்மையினர் ஆணையம் சார்பாக நிகழ்ச்சி டெல்லியில் நேற்று நடத்தப்பட்டது. இதில், மத்திய சிறுபான்மையினர் நலத்துறை அமைச்சர் முக்தர் அப்பாஸ் நக்வி கலந்துகொண்டார். அப்போது அவர், "நாட்டில் உள்ள இஸ்லாமியர்களும் அவர்களின் உரிமைகளும் பாதுகாக்கப்பட்டுவருகிறது. எனவே, குடியுரிமை திருத்த சட்டத்தை கண்டு அவர்கள் அஞ்ச வேண்டாம்.

பாகிஸ்தான், ஆப்கானிஸ்தான், வங்கதேசம் ஆகிய நாடுகளைச் சேர்ந்த சிறுபான்மையினர்களுக்கு குடியுரிமை வழங்கவே சட்டம் கொண்டுவரப்பட்டுள்ளது. அங்கு அவர்கள் நலமாக இருந்திருந்தால், இங்கு வருவதற்கு தேவை இருந்திருக்காது. மதச்சார்பற்ற நாடாக இந்தியா திகழ்வதற்கு இந்துக்களே காரணம். இஸ்லாமியர் ஒருவரை கூட நாட்டில் அந்நியராக உணர்ந்ததில்லை. நாட்டின் வளர்ச்சிக்கு மற்றவர்களுடன் சேர்ந்து சிறுபான்மையினர் உழைத்துள்ளனர்.

குடியுரிமை திருத்த சட்டம் மற்றும் தேசிய குடிமக்கள் பதிவேடு குறித்த தவறான தகவல்களை எதிர்கட்சிகள் பரப்புகின்றனர். இதனை மக்கள் நம்பாமல் அமைதி காத்திட வேண்டும். இது ஒரு சதிச் செயல். உண்மைக்கு புறம்பானதை அம்பலப்படுத்த வேண்டும்" என தெரிவித்துள்ளார். குடியுரிமை திருத்த சட்டத்தை எதிர்த்து மக்கள் தொடர்ந்து போராடிவரும் நிலையில், அமைச்சர் இந்த கருத்தை தெரிவித்துள்ளார்.

இதையும் படிங்க: போராட்ட எதிரொலி: கர்நாடகா மாநிலம் முழுவதும் 144 தடை உத்தரவு