'சீன ஆக்கிரமிப்பு குறித்து பொய் கூறுபவர்களே தேசவிரோதிகள்' - ராகுல் காந்தி

டெல்லி: இந்தியப் பகுதிகளை சீனா ஆக்கிரமித்துள்ள நிலையில், இது குறித்து பொய்யான தகவல்களை கூறுபவர்களே தேச விரோதிகள் என்று ராகுல் காந்தி குற்றம்சாட்டியுள்ளார்.

பிரதமர் நரேந்திர மோடி தலைமையிலான மத்திய அரசை, ராகுல் காந்தி பல்வேறு விவகாரங்களிலும் தொடர்ந்து விமர்சித்துவருகிறார். தனது விமர்சனங்களுக்கு வலுசேர்க்கும் வகையில், சமீப நாள்களாக வீடியோ தொகுப்புகளையும் அவர் வெளியிட்டுவருகிறார். இந்நிலையில், இன்று(ஜூலை.27) ராகுல் காந்தி வெளியிட்டுள்ள வீடியோவில், சீனா ஆக்கிரமிப்பு குறித்து உண்மைகளை மறைப்பதுதான் தேச துரோகம் என்று விமர்சித்துள்ளார்.

தொடர்ந்து ராகுல் தனது ட்விட்டர் பக்கத்தில், "இந்திய மண்ணை சீனா ஆக்கிரமித்திருக்கிறது. இந்திய நிலப்பரப்பை சீனா ஆக்கிரமிக்க அனுமதிப்பதும் அந்த உண்மையை மறைப்பதும் தேச துரோகம். இதை மக்களின் கவனத்திற்குக் கொண்டு வருவதுதான் உண்மையான தேசப்பற்று" என்று பதிவிட்டு, அத்துடன் வீடியோ ஒன்றையும் இணைத்துள்ளார்.

அந்த வீடியோ பதிவில் ராகுல் காந்தி, "இந்தியனாக எனது முதல் முன்னுரிமை எனது நாடும், நாட்டு மக்களும்தான். நமது நிலப்பரப்பில் சீனா நுழைந்துள்ளது, தற்போது நமக்கு தெளிவாகத் தெரிகிறது. இது என்னை பாதிப்படையச் செய்கிறது. அந்நியர்கள் எவ்வாறு நம் நாட்டில் ஊடுருவ முடியும்?

நான் இது தொடர்பாக செயற்கைகோள் புகைப்படங்களை பார்த்தேன். முன்னாள் ராணுவ வீரர்களுடன் பேசினேன். சீனா நம் நாட்டில் ஊடுருவியுள்ளது எனக்கு தெளிவாகத் தெரியும்போது, என்னால் மக்களிடம் பொய்க் கூறமுடியாது. இதற்காக என் அரசியல் வாழ்க்கையே முடிவுக்கு வந்தாலும், நான் அது குறித்து கவலைப்படப் போவதில்லை.

இந்தச் சூழலில், இந்தியாவை சீனா ஆக்கிரமிக்கவில்லை என்று பொய்யான தகவல்களை கூறுபவர்கள் யாருக்கும் தேசத்தின் மீது பற்று இல்லை" என்று அதில் தெரிவித்துள்ளார்.

இதையும் படிங்க:'மக்களாட்சியைப் பாதுகாக்க போராடுவோம்' - ராகுல் காந்தி