ஐபிஎல் தொடரில் சென்னை சூப்பர் கிங்ஸ் அணிக்காக ஒப்பந்தம் செய்யப்பட்டதிலிருந்து தமிழில் ட்வீட் செய்து வந்த ஹர்பஜன் சிங், தற்போது தமிழ்நாட்டில் எழும் சமூக பிரச்னைகளுக்காகவும் ட்வீட் செய்ய தொடங்கியுள்ளார்.
தூத்துக்குடி மாவட்டம் சாத்தான்குளத்தில் ஜூன் 19ஆம் தேதியன்று, ஊரடங்கின்போது கடையைத் திறந்ததற்காக தந்தை ஜெயராஜ், மகன் பென்னிக்ஸ் ஆகியோரை காவல் துறையினர் விசாரணைக்கு அழைத்துச் சென்றனர். பின்னர் கைது செய்யப்பட்டு கோவில்பட்டி கிளைச் சிறையில் அடைக்கப்பட்டிருந்த அவர்கள், சந்தேகத்திற்கிடமான முறையில் உயிரிழந்தனர்.
விசாரணைக் கைதிகள் உயிரிழந்த சம்பவம் தமிழ்நாடு முழுவதும் அதிர்வுகளை ஏற்படுத்தியது. இதனையடுத்து உயிரிழந்த ஜெயராஜ் மற்றும் பென்னிக்ஸ் ஆகியோரின் குடும்பங்களுக்கு நீதி கிடைக்க வேண்டி #JusticeForJeyarajAndFenix என்ற ஹேஷ்டாக் மூலம் சமூகவலைதளங்களில் குரல்கள் எழுந்தன.