தூக்கு மேடையில் மாதிரியை வைத்து தூக்கிலேற்றி சோதனை செய்த பவன் ஜலாத்!

டெல்லி: நிர்பயா பாலியல் வன்கொடுமை வழக்கில் தூக்கு தண்டனை விதிக்கப்பட்ட குற்றவாளிகளுக்கு தூக்குத் தண்டனையை நிறைவேற்றவுள்ள பவன் ஜலாத் திகார் சிறையை வந்தடைந்தார்.

2012ஆம் ஆண்டில் நாட்டையே பெரும் அதிர்ச்சிக்குள்ளாக்கிய டெல்லி மருத்துவ மாணவி நிர்பயா பாலியல் வன்கொடுமை வழக்கில் ஆறு பேர் கைதுசெய்யப்பட்டனர். அதில் முக்கியக் குற்றவாளியாகக் கருதப்பட்ட ராம் சிங் திகார் சிறையில் 2013 மார்ச் 11ஆம் தேதி சிறையிலேயே தூக்கிட்டு தற்கொலை செய்துகொண்டார். இன்னொரு குற்றவாளி சிறுவர் என்பதால் மூன்றாண்டு சிறார் கூர்நோக்கு இல்லத்தில் சேர்க்கப்பட்டு, பின் விடுவிக்கப்பட்டார்.

நிர்பயா வன்கொடுமை தொடர்புடைய முகேஷ், வினய், அக்ஷய், பவன் ஆகிய நான்கு பேருக்கும் தூக்குத் தண்டனை விதித்து டெல்லி விரைவு நீதிமன்றம் அதிரடி தீர்ப்பு வழங்கியது.

கடந்த எட்டு ஆண்டுகளாக நடைபெற்றுவந்த இந்த வழக்கில் தூக்குத் தண்டனை விதிக்கப்பட்ட நால்வரையும் வரும் மார்ச் 20ஆம் தேதியன்று அதிகாலையில் தூக்கில்போட நீதிமன்றம் உத்தரவிட்டுள்ளது.

தூக்கு மேடையில் மாதிரியை வைத்து தூக்கிலேற்றி சோதனைசெய்த பவன் ஜலாத்!

இதனிடையே, தூக்குத் தண்டனை உத்தரவு பிறப்பிக்கப்பட்ட நான்கு பேரையும் தூக்கிலேற்ற மீரட்டைச் சேர்ந்த உத்தரப் பிரதேச சிறைத் துறை ஊழியரான பவன் ஜலாத் என்பவரைத் திகார் சிறைத் துறை தேர்ந்தெடுத்தது.

இதையடுத்து, இன்று திகார் சிறை நிர்வாகத்தின் ஏற்பாட்டில், டெல்லி காவல் துறை மூன்றாம் படையைச் சேர்ந்த ஆயுதம் ஏந்திய 20 காவலர்களின் பாதுகாப்போடு பவன் ஜலாத் திகார் சிறைக்கு மிகவும் பாதுகாப்பான வாகனத்தில் ரகசியமாக அழைத்துவரப்பட்டதாக அறிய முடிகிறது.

மேலும், அவர் சிறைச்சாலையில் அமைக்கப்பட்டிருக்கும் தூக்கு மேடையில் மாதிரியை வைத்து தூக்கிலேற்றி சோதனை நடத்தியுள்ளார்.

இது தொடர்பாக, திகார் சிறை காவல் உயர் அலுவலர் சந்தீப் கோயல் கூறும்போது, “டெல்லி நீதிமன்றத்தில் குற்றவாளிகளுக்குத் தூக்குத் தண்டனை அளித்து உத்தரவிடப்பட்டுள்ளது. அந்த உத்தரவின்படி அவர்களுக்கு தண்டனை அளிக்கப்படும்” என்றார்.

நிர்பயா வழக்கில் குற்றவாளிகள் நான்கு பேரும் வருகிற 22ஆம் தேதி டெல்லி திகார் சிறையில் தூக்கில் போடப்படவுள்ளனர் என்பது குறிப்பிடத்தக்கது.

இதையும் படிங்க : நிர்பயா குற்றவாளிகளுக்கு தூக்கு தண்டனையை நிறைவேற்றுகிறார் பவன் ஜலாட்!