மேற்கு வங்க மாநில முதலமைச்சர் மம்தா பானர்ஜி ஐக்கிய முற்போக்கு அமைச்சரவையில் 2009-11ஆம் ஆண்டில் ரயில்வேத் துறை அமைச்சராகப் பதவி வகித்தார். அப்போது கொல்கத்தாவின் கிழக்கு - மேற்கு எல்லை போக்குவரத்து மேம்பாட்டிற்காக, கிழக்கு - மேற்கு இணைப்புத் திட்டம் வடிவமைக்கப்பட்டது.
இந்தத் திட்டம் நிறைவடைந்து அதன் தொடக்க விழா நேற்று ரயில்வேத் துறை அமைச்சர் பியூஷ் கோயல் தலைமையில் நடைபெற்றது. அதில் மம்தாவை விருந்தினராக அழைக்கவில்லை. இது குறித்து தான் மிகவும் வேதனையடைந்ததாக மம்தா பானர்ஜி தெரிவித்துள்ளார்.
இது குறித்து அவர் பேசுகையில், ’கிழக்கு - மேற்கு மெட்ரோ இணைப்புத் திட்டம் எங்களின் கடும் உழைப்பால் உருவானது. இதற்கான ஒப்பதலை பெற கண்ணீர் விடாதக் குறையாக நாங்கள் பாடுபட்டோம். இதன் திறப்பு விழா குறித்து தகவல்கூட தெரிவிக்காதது பெரும் வருத்தமளித்தது’ என்றார்.