பிரிட்டன் விமானங்களின் தடையை நீட்டிக்க வேண்டும் - கெஜ்ரிவால்

டெல்லி: பிரிட்டன் நாட்டுடனான பயணிகள் விமான போக்குவரத்திற்கான தடையை நீட்டிக்க வேண்டும் என அரவிந்த் கெஜ்ரிவால் கோரிக்கைவிடுத்துள்ளார்.

பிரிட்டனில் மரபியல் மாற்றமடைந்த உருமாறிய கரோனா வேகமாகப் பரவிவரும் நிலையில், அந்நாட்டுடனான பயணிகள் விமான போக்குவரத்திற்கான தடையை நீட்டிக்க வேண்டும் என டெல்லி முதலமைச்சர் அரவிந்த் கெஜ்ரிவால் கோரிக்கைவிடுத்துள்ளார்.

இது குறித்து அவர் தனது ட்விட்டர் பக்கத்தில், "பிரிட்டன் நாட்டுடனான பயணிகள் விமான போக்குவரத்திற்கான தடையை நீக்க மத்திய அரசு முடிவுசெய்துள்ளது. அந்நாட்டில் தீவிரமான சூழல் நிலவிவரும் நிலையில், அந்தத் தடையை ஜனவரி 31ஆம் தேதிவரை நீட்டிக்க மத்திய அரசிடம் கோரிக்கைவிடுக்கிறேன்" எனப் பதிவிட்டுள்ளார்.

ஜனவரி 6ஆம் தேதிமுதல் இந்தியாவிலிருந்து பிரிட்டனுக்கு விமானங்கள் இயக்கப்படும் என விமான போக்குவரத்துத் துறை அமைச்சர் ஹர்திப் சிங் புரி தெரிவித்திருந்தார். அதேபோல், பிரிட்டனிலிருந்து இந்தியாவுக்கு ஜனவரி 8ஆம் தேதிமுதல் விமானங்கள் இயக்கப்படும் எனவும் அவர் அறிவித்திருந்தார்.

பிரிட்டனில் உருமாறிய கரோனாவால் பாதிக்கப்பட்டோரின் எண்ணிக்கை தொடர்ந்து அதிகரித்துவந்த நிலையில், டிசம்பர் 23ஆம் தேதி முதல் ஜனவரி 7ஆம் தேதி வரை பிரிட்டன் நாட்டுடனான பயணிகள் விமான போக்குவரத்திற்குத் தடைவிதிக்கப்பட்டது.