நாட்டின் பொதுத் துறை நிறுவனமான, 'ஏர் இந்தியா' விமான போக்குவரத்து நிறுவனம் கடந்த சில ஆண்டுகளாக கடுமையான இழப்பைச் சந்தித்து வருகிறது. நஷ்டத்தில் இயங்கிவரும் இந்நிறுவனத்தை ஏலம் விட்டு, முழுமையாக தனியாருக்கு விற்க மத்திய அரசு முடிவு செய்துள்ளது.
இதில், ஏர் இந்தியா நிறுவனத்தின் ஊழியர்களும், அந்த நிறுவனத்தை வாங்க ஏலம் கோரியுள்ளனர். தனது வசமிருக்கும் ஏர் இந்தியா நிறுவனத்தின் பங்குகளை விற்க, கடந்த 2018ஆம் ஆண்டே மத்திய அரசு முயற்சி செய்தது.
ஆனால் அப்போது அந்தப் பங்குகளை வாங்க யாரும் முன்வரவில்லை. நிதி நெருக்கடியால் போராடிவரும் ஏர் இந்தியா நிறுவனத்தின் செயல்பாடுகளை கட்டுப்படுத்தத் தேவையான அளவு பங்குகளை வாங்க ஏர் இந்தியா ஊழியர்கள் குழு ஒன்று முன் வந்துள்ளது.
51 விழுக்காடு பங்குகளை வாங்கும் ஊழியர்கள்
அரசின் வசம் உள்ள ஏர் இந்தியா நிறுவனத்தின் 100 சதவீத பங்குகளை வாங்க ஏலம் கோருவதற்கான காலக்கெடு முடிந்தது. அதில் அமெரிக்காவில் இருந்து இயங்கும் முதலீட்டு நிறுவனமான இன்டரப்ஸ் (Interups) நிறுவனம் பங்குகளை வாங்க முன்வந்துள்ளது.
அந்த நிறுவனம் கோரியுள்ள ஏலத்தில் ஏர் இந்தியாவின் பங்குகளை 49 விழுக்காடு இன்டரப்ஸ் நிறுவனம் வைத்திருக்கும் என்றும், அதன் நிர்வாகத்தைக் கட்டுப்படுத்தத் தேவையான பெரும்பான்மை பங்கான 51 விழுக்காடு பங்குகளை அதன் ஊழியர்கள் வைத்திருப்பார்கள் என்றும் தெரிவிக்கப்பட்டுள்ளது.