அது 1998ஆம் ஆண்டு. அஸ்ஸாமில் பணியமர்த்தப்பட்ட இளம் உளவுத்துறை அலுவலர் ஆர். கே. யாதாவ், அங்கு கண்ட காட்சிகளால் பெரிதும் பாதிக்கப்பட்டார். அஸ்ஸாம் பூர்வகுடிகளான போடோ இனக்குழுவினருக்கு உளவுத் துறையே பயிற்சியும் ஆயுதங்களையும் வழங்குவதைக் கண்டார். ஆனால், இதற்கு அவரால் வெறும் எதிர்ப்பு மட்டுமே தெரிவிக்க முடிந்தது. உளவுத் துறையிலிருந்து பணி நீக்கம் செய்யப்பட்ட அவர், அஸ்ஸாமில் கண்ட காட்சிகளை விவரித்து புத்தகம் ஒன்றை எழுதியுள்ளார்.
அஸ்ஸாமைச் சேர்ந்த மாநிலங்களவை உறுப்பினர் நாகன் சைக்கியாவும், இந்த விவகாரத்தை நாடாளுமன்ற மேலவையில் எழுப்பினார். சைக்கியா 1986-1992 வரை மாநிலங்களவையில் உறுப்பினராக இருந்தவர். 1990 முதல்1992 வரை மாநிலங்களவை துணைத் தலைவராகவும் இருந்தவர்.
உளவுத் துறையின் இந்தப் பயிற்சியை பெற்ற இளைஞர்கள், பின்நாள்களில் போடோ லிபரேஷன் டைகர்ஸ் (பி.எல்.டி) என்ற பயங்கரவாத அமைப்பை உருவாக்கினர். இவர்கள் IED எனப்படும் குண்டுகளை தயாரிப்பதில் நிபுணத்துவத்துவம் பெற்றவர்கள். அப்போதிலிருந்து, பல போடோ ஆயுதக் குழுக்கள், மேற்கு அஸ்ஸாமில் உருவானது. அவர்கள் சுயாட்சியில் முதல் முழுமையான விடுதலை வரை, பல்வேறு கோரிக்கைகளில் முன்வைத்து போராடினர்.
மங்கோலாய்ட் இனத்தைச் சேர்ந்த போடோ பழங்குடிகள், திபெத்தோ - பர்மிய மொழியை தங்கள் தாய் மொழியாகக் கொண்டவர்கள். இவர்கள்தான் அஸ்ஸாமின் பூர்வகுடிகள். அப்போது வளர்ந்துவந்த அஸ்ஸாம் பிராந்திய அரசியலை நீர்த்துப்போகச் செய்யவே, அரசு போடோ குழுக்களை ஆதரித்தாகவும் குற்றாச்சாட்டுகள் உள்ளன.
திங்கட்கிழமை கையெழுத்தான ஒப்பந்தம்
ஆனால், திங்களன்று (ஜனவரி 27, 2020), ஆயுதமேந்திப் போராடும் கடைசி போடோ அமைப்புகளில் ஒன்றான தேசிய ஜனநாயக முன்னணி போடோலாந்து (என்.டி.எஃப்.பி) என்ற அமைப்பும் அரசுடன் முத்தரப்பு ஒப்பந்தத்தில் கையெழுத்திட்டது.
முந்தைய காலங்களில் கையெழுத்தான இரண்டு உடன்படிக்கைகளின் அடுத்தகட்டம்தான் இந்த ஒப்பந்தம் என்று கூறலாம். 1993ஆம் ஆண்டு, ஏ.பி.எஸ்.யு அமைப்புடன் மேற்கொள்ளப்பட்ட ஒப்பந்தம், போடோலாந்து தன்னாட்சி கவுன்சில் அமைக்க வழிவகுத்தது. அதேபோல 2003ஆம் ஆண்டு, பி.எல்.டி அமைப்புடன் ஏற்பட்ட ஒப்பந்தம், அதிக அரசியல் அதிகாரங்களைக் கொண்ட போடோலாந்து பிராந்திய கவுன்சில் (பி.டி.சி) என்ற புதிய அமைப்பை உருவாக்க வழிவகுத்தது.
மூன்று தலைமுறைகளாக தொடரும் போடோ பயங்கரவாத அமைப்புகளால், இதுவரை நான்காயிரம் உயிரிழப்புகள் ஏற்பட்டுள்ளன. ஜனவரி 30ஆம் தேதி நடைபெறவுள்ள விழாவில், 1,500க்கும் மேற்பட்ட என்.டி.எஃப்.பி. தீவிரவாதிகள் தங்கள் ஆயுதங்களை ஒப்படைக்கவுள்ளனர்.
இதற்கு சில நாள்களுக்கு முன்னர், என்.டி.எஃப்.பி அமைப்பைச் சேர்ந்த ஆயுதமேந்திய உறுப்பினர்கள் மியான்மரிலுள்ள தங்கள் தளங்களிலிருந்து இந்தியாவுக்கு வந்துள்ளனர். இவர்கள் மணிப்பூரில் மோரே மற்றும் நாகாலாந்தில் லாங்வா வழியாக இந்தியா வந்தடைந்தனர்.
இந்நிலையில்தான், திங்கள்கிழமைன்று உள் துறை அமைச்சர் அமித் ஷா முன்னிலையில் உள் துறை அமைச்சகம், அஸ்ஸாம் அரசு, போடோ குழு ஆகியவைகளுக்கிடையே முத்தரப்பு ஒப்பந்தம் கையெழுத்தானது. போடோ குழு சார்பில் என்.டி.எஃ.பி., அனைத்து போடோ மாணவர் சங்கம் (ஏ.பி.எஸ்.யு.) யுனைடெட் போடோ மக்கள் அமைப்பு (UBPO) ஆகிய அமைப்புகளின் பிரதிநிதிகள் இருந்தனர்.
இதில் போடோ மாணவர் சங்கம் (ஏ.பி.எஸ்.யு.) போடோக்களுக்கு தனி மாநிலம் அமைக்கக்கோரி 1970களின் தொடக்கம் முதல் போராடிவருகிறார்கள். யுனைடெட் போடோ மக்கள் அமைப்பு (UBPO) போடோக்களின் காலாசாரம், பொருளாதாரம் மற்றும் அரசியல் உரிமைகள் பாதுகாக்கப்பட வேண்டும் என்று போராடிவருகின்றனர். இவர்களுடன் பூரன விடுதலை கோரி போராடும் என்.டி.எஃ.பி. அமைப்பும் இணைந்து திங்களன்று முத்தரப்பு ஒப்பந்தத்தில் கையெழுத்திட்டது.
முன்வைக்கப்பட்ட கோரிக்கைகள்
அஸ்ஸாமின் மிகப் பெரிய பழங்குடி சமூகமான போடோக்கள், பிரம்மபுத்ரா பள்ளத்தாக்கிலுள்ள அசாமி மொழி பேசும் மக்களுக்கு எதிராகவும், வங்காள மொழி பேசும் (வங்கதேசத்திலிருந்து குடியேறிய) இஸ்லாமியர்களுக்கு எதிராகவும் கருத்துகளை கொண்டிருந்தன. அந்நியப்பட்ட உணர்வைத் தவிர, இவர்களால் தங்களுக்கு அநீதி இழைக்கப்படுத்தாகவும் போடோக்கள் கருதினர்.
மேற்கு அஸ்ஸாம் மாநிலத்திலுள்ள ஏராளமான காலி இடங்கள், கடந்த காலங்களில் பாரம்பரிய சாகுபடியைப் பின்பற்றிய போடோ விவசாயிகளின் விவசாய நிலங்களாக இருந்தன. இந்த நிலங்கள்தான் அண்டை பகுதிகளைச் சேர்ந்த போடோ அல்லாத மக்களை இப்பகுதியை நோக்கி வரவழைத்தது.