காஷ்மீரில் தொலைத்தொடர்பு சேவைகள் திரும்பின...!

காஷ்மீரில் முடக்கப்பட்டிருந்த தொலைத்தொடர்பு சேவைகள் ஈத் பண்டிகைக்காக மீண்டும் இயல்பு நிலைக்குக் கொண்டுவரப்படுகின்றன.

காஷ்மீர் மாநிலத்திற்கு அளிக்கப்பட்டிருந்த சிறப்பு அந்தஸ்தான சட்டப்பிரிவு 370ஐ மத்திய அரசு அதிரடியாக நீக்கியது. மாநிலம் இரண்டாகப் பிரிக்கப்பட்டு காஷ்மீர் சட்டப்பேரவையுடன் கூடிய யூனியன் பிரதேசமாகவும், லடாக் சட்டப்பேரவையற்ற யூனியன் பிரதேசமாகவும் மாற்றப்பட்டுள்ளது.

இந்த நடவடிக்கையால் அங்கு சட்டம் ஒழுங்கு பிரச்னை ஏற்படக் கூடாது என முன்னெச்சரிக்கை நடவடிக்கைகள் மேற்கொள்ளப்பட்டன. சுமார் 50 ஆயிரம் பாதுகாப்புப் படையினர் அங்கு பணியமர்த்தப்பட்டனர். முன்னாள் முதலமைச்சர் உட்பட அங்குள்ள கட்சித் தலைவர்கள் வீட்டுக் காவலில் வைக்கப்பட்டுள்ளதாகக் கூறப்படுகிறது. மேலும், தொலைப்பேசி, இணையம் உள்ளிட்ட தொலைத் தொடர்பு சாதனங்கள் காஷ்மீர் மாநிலத்தில் துண்டிக்கப்பட்டன.

இந்த விவகாரம் தொடர்பாகப் பிரதமர் நரேந்திர மோடி நாட்டு மக்களுக்கு உரையாற்றினார். அதில் புதிய காஷ்மீர், லடாக்கை உருவாக்க ஒட்டுமொத்த இந்தியாவும் தயாராக உள்ளதாகவும், ஈத் பண்டிகை சிறப்பாக கொண்டாட அரசு அனைத்து ஏற்பாடுகளையும் செய்வதாகவும் அவர் உறுதியளித்தார்.

இந்நிலையில், காஷ்மீர் மாநிலத்தின் பலபகுதிகளில் இன்று தொலைபேசி, இணையச் சேவைகள் திரும்பியுள்ளதாகத் தெரிவிக்கப்படுகிறது. வெள்ளிக்கிழமை தொழுகைகளுக்காக மக்களுக்கு ஏற்பாடு செய்யப்பட்டுள்ளதாகவும், வேறு பகுதிகளில் உள்ள காஷ்மீர் மக்கள் தொடர்புகொள்ள அனைத்து நடவடிக்கைகளும் எடுக்கப்பட்டுள்ளதாகவும் அம்மாநில காவல்துறைத் தலைவர் தல்பீர் சிங் தெரிவித்துள்ளார்.