இந்திய எல்லைப் பகுதியில் ராணுவ அலுவலர்கள் கடந்த மாதம் கட்டமைப்புப் பணிகள் மேற்கொண்டனர். அப்போது, சீன ராணுவம் அத்துமீறி உள்ளே நுழைந்தது.
இந்தப் பிரச்னையால் இந்தியா - சீனா எல்லையில் பதற்றம் ஏற்பட்டது. இந்தியாவின் எல்லைப் பகுதியான கிழக்கு லடாக்கை அடுத்துள்ள கல்வான் பள்ளத்தாக்கில் கடந்த 15ஆம் தேதி இரவு பணியிலிருந்த ராணுவ அலுவலர் கர்னல் உள்ளிட்ட 20-க்கும் மேற்பட்ட இந்திய படைவீரர்களை சீன ராணுவத்தினர் காட்டுமிராண்டித்தனமாகப் படுகொலை செய்தனர்.
இந்தத் தாக்குதலில், பிகார் மாநிலத்தைச் சேர்ந்த ஜெய் கிஷோர், சந்தன் குமார், குண்டகுமார், அமன் குமார், சுனில் குமார் ஆகிய ஐந்து ராணுவ வீரர்கள் வீர மரணமடைந்தனர்.
எல்லையில் உயிரிழந்த வீரர்களில் ஒருவரான ஜெய் கிஷோரின் உடல் வைசாலி மாவட்டத்தை அடுத்த சக் ஃபதே கிராமத்தில் உள்ள அவரது இல்லத்தை நேற்று வந்தடைந்தது.
இதனைத் தொடர்ந்து நடைபெற்ற ஜெய் கிஷோரின் இறுதி மரியாதை நிகழ்வில் ஆயிரக்கணக்கான மக்கள் ஒன்று கூடி வீரவணக்கம் செலுத்தினார்கள்.
இதையடுத்து அவரது உடல் புதைக்கப்பட்டது. அந்தப் பகுதியே 'பாரத் மாதா கி ஜெய்', 'ஜெய் கிஷோர் அமர் ரஹே' (வீரன் ஜெய் கிஷோரின் புகழ் ஓங்குக) முழக்கங்களால் அதிர்ந்தது.
வீரமரணமடைந்த ராணுவ வீரர்களுக்கு பிகார் மாநிலத்தின் முதலமைச்சர் நிதிஷ் குமார் தலா ரூ.36 லட்சம் நிவாரணமும், அவர்களின் குடும்பத்துக்கு அரசு வேலையும் வழங்கப்படுமென அறிவித்தார்.
