சிறுவனை பாலியல் தொந்தரவு செய்த இளைஞருக்கு 10 ஆண்டுகள் சிறை!

புதுச்சேரி: வீட்டின் எதிரே விளையாடிய சிறுவனை கடத்தி சென்று பாலியல் தொந்தரவு கொடுத்த இளைஞருக்கு 10 ஆண்டுகள் சிறை தண்டனை விதித்து புதுச்சேரி நீதிமன்றம் தீர்ப்பளித்துள்ளது.

புதுச்சேரி முத்தியால்பேட்டையைச் சேர்ந்த ஒன்பது வயது சிறுவன் கடந்த ஆண்டு ஏப்ரல் மாதம் 8ஆம் தேதி வீட்டின் அருகே விளையாடிக் கொண்டிருந்தபோது, மாயமானார். இது குறித்து பெற்றோர் கொடுத்த புகாரின் பேரில் முத்தியால்பேட்டை காவல் துறையினர் சிசிடிவி கேமரா பதிவுகளை கைப்பற்றி ஆய்வு செய்தனர். அதில் இருசக்கர வாகனத்தில் வந்த இளைஞர் ஒருவர் சிறுவனை கடத்திச் சென்றது தெரிய வந்தது.

இதனையடுத்து, அந்த வாகனத்தின் பதிவு எண்ணை கொண்டு விசாரணை நடத்தியதில், சிறுவனை கடத்தியது விழுப்புரம் மாவட்டம் கோட்டக்குப்பம், குண்டூர் கிராமத்தைச் சேர்ந்த உசைன் என தெரியவந்தது. சாக்லெட் வாங்கித் தருவதாகக் கூறி கடத்தி சென்று ஆள் நடமாட்டம் இல்லாத தென்னந்தோப்பில் சிறுவனுக்கு பாலியல் தொந்தரவு கொடுத்துடன் , கொலை செய்ய முயன்றது தெரியவந்தது.

இதில் சிறுவனை மீட்ட காவல் துறையினர் மருத்துவமனையில் சேர்த்து சிகிச்சை அளித்தனர். உசைன் மீது ஐந்து பிரிவுகளில் வழக்குப் பதிவு செய்து காலாப்பட்டு சிறையில் அடைத்தனர். இவ்வழக்கு புதுச்சேரி நீதிமன்றம் போக்சோ சிறப்பு நீதிமன்றத்தில் விசாரிக்கப்பட்டு வந்தது.

இந்நிலையில், நேற்று (ஆக். 6) காணொலி காட்சி மூலம் இந்த வழக்கு விசாரணைக்கு வந்தபோது, இதை விசாரித்த சிறப்பு நீதிமன்ற நீதிபதியும், தலைமை நீதிபதி தனபாலும், உசைன் குற்றவாளி என தீர்ப்பளித்து அவருக்கு போக்சோ சட்டத்தின் கீழ் 10 ஆண்டுகள் சிறை தண்டனையும், 3000 ரூபாய் அபராதமும் விதித்து தீர்ப்பளித்தனர்.

இதையும் படிங்க...இலங்கை தாதா அங்கொட லொக்கா வழக்கில் திடீர் திருப்பம்!