288 உறுப்பினர்களைக் கொண்ட மகாராஷ்டிரா சட்டப்பேரவைக்கு அக்டோபர் 21ஆம் தேதி தேர்தல் நடைபெறும் என்று தேர்தல் ஆணையம் அறிவித்துள்ளது. அதற்கு இன்னும் ஒரு மாதம் கூட இல்லாத நிலையில், அரசியல் கட்சிகள் தீவிர தேர்தல் பரப்புரையில் ஈடுபட்டுவருகின்றன.
தேர்தல் தேதி அறிவிப்பதற்கு முன்பாகவே கூட்டணியை உறுதி செய்த காங்கிரஸ்-தேசியவாத காங்கிரஸ் கட்சிகள் தலா 125 தொகுதிகளில் போட்டியிடுகின்றன. எஞ்சிய தொகுதிகளைக் கூட்டணியில் உள்ள பிற கட்சிகளுக்கு வழங்குவது என்று ஏற்கனவே முடிவெடுத்துவிட்டன.
ஆனால், ஆளும் பாஜக தரப்போ கூட்டணி விவகாரத்தில் கவனம் செலுத்தாமல், தனிப்பெரும்பான்மையுடன் ஆட்சி அமைத்துவிடலாம் என்ற நம்பிக்கையில் காய் நகர்த்திவருகிறது. இதனால், கூட்டணி முடிவை அறிவிப்பதில் இரு கட்சிகளுக்கிடையே இழுபறி நீடிக்கிறது.
ஏனெனில், தேர்தல் பரப்புரைக்காக நேற்று முன்தினம் மும்பை வந்த பாஜக தலைவர் அமித் ஷா, அக்கட்சியுடன் கூட்டணியில் இருப்பதாக நம்பப்படும் சிவசேனாவின் பெயரை ஒரு இடத்தில் கூட பயன்படுத்தவில்லை. இதன் காரணமாகவே கூட்டணியில் விரிசல் ஏற்பட்டிருப்பது உறுதியாகியிருப்பதாக அரசியல் விமர்சகர்கள் கருதுகின்றனர்.
மக்களவைத் தேர்தல் கூட்டணி பேச்சுவார்த்தையின்போதே சட்டப்பேரவைத் தேர்தலுக்கான உடன்பாடு ஏற்பட்டுவிட்டதாக சிவசேனா கூறிவந்த நிலையில், தேர்தலில் பாஜக பெற்ற அபார வெற்றி, காஷ்மீருக்கு வழங்கப்பட்ட சிறப்புத் தகுதி ரத்து ஆகிய நடவடிக்கைகளால் தங்களின் செல்வாக்கு உயர்ந்திருப்பதாக பாஜக தலைமை கருதுவதே இந்த இழுபறிக்கு காரணம் என்று கூறப்படுகிறது.
இதையும் படிங்க:'சாவர்க்கர் பிரதமராகியிருந்தால் பாகிஸ்தான் பிறந்திருக்காது...!'
