16:48 November 09
தீர்ப்பை எதிர்த்து மறு சீராய்வு மனு தாக்கல் செய்யப்படாது - சன்னி வக்பு வாரியம்
தீர்ப்பு குறித்து உத்தரப் பிரதேச மாநில சன்னி வக்பு வாரியத் தலைவர் ஷபர் ஃபருக், "உச்ச நீதிமன்ற தீர்ப்பை தாழ்மையுடன் ஏற்றுக்கொள்கிறோம். தீர்ப்பை எதிர்த்து சன்னி வக்பு வாரியம் மறு சீராய்வு மனுவை தாக்கல் செய்யாது" என்றார்.
16:40 November 09
வழக்கு குறித்து சிவசேனா கட்சித் தலைவர் உத்தவ் தாக்கரே, "இந்திய வரலாற்றில் அயோத்தி வழக்கின் தீர்ப்பு பொன் எழுத்துகளால் பொறிக்கப்பட வேண்டியவை. அனைவரும் தீர்ப்பையும் ஏற்றுக்கொண்டுள்ளார்கள். நவம்பர் 24ஆம் தேதி அயோத்திக்கு செல்லவிருக்கிறேன். அத்வானியை சந்தித்து வாழ்த்துகளும் நன்றியையும் தெரிவிக்கவுள்ளேன். இதற்காக அவர் ரத யாத்திரையை மேற்கொண்டார்" எனத் தெரிவித்தார்.
16:31 November 09
பாஜக மூத்தத் தலைவரும் மத்திய முன்னாள் அமைச்சருமான உமா பாரதி, "அயோத்தி தீர்ப்பு வெளியானதைத் தொடர்ந்து, அத்வானியின் பாதத்தில் விழுந்து வணங்க விரும்புகிறேன். அயோத்தி இயக்கத்தில் விஷ்வ இந்து பரிஷத் தலைவர் அசோக் சிங்காலின் பங்கு மகத்தானது. ராமர் கோயில் கட்டுவதற்காக அத்வானி பெரும் பங்கு ஆற்றினார். பாஜக ஆட்சி அமைத்ததற்கு அது மிகப்பெரிய பங்கு வகித்தது" என்றார்.
16:18 November 09
பாஜக மூத்தத் தலைவர் முரளி மனோகர் ஜோஷி, அயோத்தி வழக்கில் வழங்கப்பட்ட தீர்ப்பு இந்தியர்களுக்கான வெற்றி எனத் தெரிவித்தார்.
15:57 November 09
அலகாபாத் உயர் நீதிமன்றத்தின் தீர்ப்பு நிலையானதல்ல - உச்ச நீதிமன்றம் கருத்து
சர்ச்சைக்குரிய நிலத்தை மூன்றாக பிரிக்கும் அலகாபாத் உயர் நீதிமன்றத்தின் தீர்ப்பு நிலையானதல்ல. நீதிமன்றம் வழங்கிய தீர்ப்பை நிறைவேற்றுவது சாத்தியமற்றது. நிலத்தை பிரிப்பதால் எந்தத் தரப்பினருக்கும் நன்மை விளையாது. அமைதி காக்க முடியாது. அயோத்தி வழக்கின் முக்கிய மனுதாரரான நிர்மோஹி அகாராவின் மனு தள்ளுபடி செய்ததைத் தொடர்ந்து, கோயில் கட்டும் பணிகளை மேற்பார்வையிடவிருக்கும் அறக்கட்டளையின் உறுப்பினராக அவர்களை சேர்த்துக் கொள்ள உச்ச நீதிமன்றம் உத்தரவிட்டுள்ளது.
15:17 November 09
அயோத்தி தீர்ப்பு குறித்து ராகுல் காந்தி, "அயோத்தி விவகாரம் குறித்த உச்ச நீதிமன்றத்தின் தீர்ப்பை சமூக நல்லிணக்கத்தை கடைப்பிடிப்பதன் மூலம்தான் சிறப்பு செய்ய முடியும். ஒருவருக்கொருவர் சகோதரத்துவம், அன்பை பரிமாறிக்கொள்ளும் நேரம் இது" என்றார்.
15:06 November 09
டிசம்பர் 1ஆம் தேதி டெல்லியில் உள்ள ராம்லீலா மைதானத்தில் காங்கிரஸ் சார்பாக நடைபெறவிருந்த பேரணியை அக்கட்சி அயோத்தி தீர்ப்பை காரணம் காட்டி ரத்து செய்துள்ளது.
15:02 November 09
அயோத்தி குறித்த செய்திகளை வெளியிடும்போது, விதிகளை பின்பற்றி நடந்து கொள்ள வேண்டும் என தகவல் மற்றும் ஒளிபரப்பு அமைச்சகம் அனைத்து காட்சி ஊடகங்களுக்கும் உத்தரவு பிறப்பித்துள்ளது.
14:49 November 09
அயோத்தி வழக்கின் தீர்ப்பை பாஜக மனப்பூர்வமாக ஏற்றுக்கொள்கிறது என அக்கட்சியின் மூத்தத் தலைவர் இல. கணேசன் தெரிவித்துள்ளார்.
14:49 November 09
அயோத்தி தீர்ப்பை அனைத்து தரப்பினரும் சமமான சிந்தனை, மதநல்லிணக்கத்துடன் முன்னெடுங்கள் என திமுக தலைவர் ஸ்டாலின் வேண்டுகோள் விடுத்துள்ளார்.
14:49 November 09
ராமர் கோயில் கட்டுவது குறித்து நடிகர் ரஜினிகாந்த், "உச்ச நீதிமன்றத்தின் தீர்ப்பை நான் மதிக்கிறேன். அனைவரும் மதிக்க வேண்டும் எனக் கேட்டுக்கொள்கிறேன். நாட்டின் நன்மைக்காகவும் வளர்ச்சிக்காகவும் அனைத்து மதத்தினரும் ஒன்றிணைய வேண்டும்" என்றார்.
14:19 November 09
தீர்ப்பு குறித்து பிரியங்கா காந்தி, "அனைவரும் தீர்ப்பை மதிக்க வேண்டும் எனக் கேட்டுக்கொள்கிறேன். பல ஆண்டுகளாக கடைப்பிடித்துவரும் ஒற்றுமையை இந்த சூழ்நிலையிலும் கடைப்பிடிக்க வேண்டும். சகோதரத்துவத்தை பேணி காக்க வேண்டும்" என்றார்
14:10 November 09
அயோத்தி தீர்ப்பு குறித்து அகில இந்திய மஜ்லிஸ் கட்சியின் தலைவரும் மக்களவை உறுப்பினருமான ஓவைசி, "தீர்ப்பு திருப்தி அளிக்கவில்லை. அனைத்துக்கும் உயர்வாக உச்ச நீதிமன்றம் இருக்கலாம், ஆனால் அது தவறிழைக்க வாய்ப்புள்ளது. அரசியலமைப்பின் மீது எங்களுக்கு நம்பிக்கை உள்ளது. எங்கள் உரிமைக்காகப் போராடுகிறோம். மாற்று இடமான ஐந்து ஏக்கர் நிலத்தை ஏற்கக் கூடாது. காங்கிரஸ் அதன் உண்மை முகத்தை காட்டியுள்ளது. போலித்தனம், வஞ்சகத்தன்மை உடைய காங்கிரஸ் கட்சியின் காலத்தில்தான் ராமர் சிலை சர்ச்சைக்குரிய பகுதியில் வைக்கப்பட்டது. இந்துக்களின் வழிபாட்டிற்காக பகுதி திறக்கப்படவில்லை எனில் அங்கு மசூதி இருந்திருக்கக்கூடும்" எனத் தெரிவித்துள்ளார்.
14:04 November 09
தீர்ப்பு குறித்து ஆர்.எஸ்.எஸ். தலைவர் மோகன் பகவத், "உச்ச நீதிமன்ற தீர்ப்பை வரவேற்கிறேன். சரியான தீர்ப்பு வழங்கப்பட்டுள்ளது. இதனை வெற்றியாகவோ, தோல்வியாகவோ கருதக் கூடாது. சமூகத்தில் அமைதி நிலவிட வேண்டும்" என்றார்.
13:55 November 09
அயோத்தி வழக்கின் தீர்ப்பு வெளியான நிலையில், உள்துறை அமைச்சர் அமித் ஷா சட்டம் ஒழுங்கு குறித்து அனைத்து மாநில முதலமைச்சர்களுடன் கேட்டறிந்தார். உரிய நடவடிக்கைகள் எடுக்கவும் அவர் உத்தரவிட்டுள்ளார்.
தீர்ப்பு குறித்து ரவி சங்கர், "இது வரலாற்று தீர்ப்பு. நான் இதனை வரவேற்கிறேன். பல ஆண்டுகளாக நடந்து வந்த இந்த வழக்குக்கு இன்று தீர்ப்பு வழங்கப்பட்டுள்ளது. அமைதியும் சமூக நல்லிணக்கமும் நிலவ வேண்டும்" என்றார்.
12:54 November 09
தீர்ப்பு குறித்து பிரதமர் நரேந்திர மோடி, "நீதித்துறையில் மக்கள் வைத்துள்ள நம்பிக்கையை இந்த தீர்ப்பு மேலும் வலுப்படுத்தும். பல்லாயிரக்கணக்கான ஆண்டுகளாக நாட்டில் சகோதரத்துவம் கடைபிடிக்கப்பட்டு வருகிறது. இந்நிலையில், 130 கோடி இந்தியர்கள் அமைதியுடனும், கட்டுப்பாட்டுடனும் இருக்க வேண்டும்.
பல காரணங்களால் இந்த தீர்ப்பு முக்கியத்துவம் பெறுகிறது. ஒரு பிரச்னையை தீர்க்க நீதித்துறை எவ்வளவு முக்கிய பங்காற்றுகிறது என்பது இதன் மூலம் தெளிவாகிறது. தங்கள் வாதங்களை முன்வைக்க இரு தரப்புகளுக்கும் போதுமான நேரமும், வாய்ப்பும் அளிக்கப்பட்டது. பல ஆண்டுகளாக நடந்த பிரச்னையை நீதித்துறை முடித்து வைத்துள்ளது" என தெரிவித்துள்ளார்.
12:53 November 09
தீர்ப்பு குறித்து காங்கிரஸ் செய்தித் தொடர்பாளர் ரண்தீப் சுர்ஜேவாலா, "அயோத்தி தீர்ப்பு வெளியாகியுள்ளது. ராமர் கட்டுவதற்கு ஆதரவாகவே காங்கிரஸ் கட்சி உள்ளது. இந்த தீர்ப்பின் மூலம் ராமர் கோயில் கட்டுவதற்கான கதவுகள் திறக்கப்பட்டுள்ளன. அதே சமயத்தில் இதனை வைத்து அரசியல் செய்யும் பாஜகவின் கதவுகள் அடைக்கப்பட்டுள்ளன" என்றார்.
12:50 November 09
அயோத்தி தீர்ப்பு குறித்து வழக்கின் முக்கிய மனு தாரரான சன்னி வக்பு வாரியம், "உச்ச நீதிமன்ற தீர்ப்பை ஏற்கிறோம். ஆனால், எங்களுக்கு அதில் திருப்தியில்லை. தீர்ப்பின் நகல் கிடைத்த பிறகு அடுத்த கட்ட நடவடிக்கை குறித்து முடிவெடுக்கப்படும்.
தீர்ப்புக்கு எதிராக உச்ச நீதிமன்றத்தில் மறு சீராய்வு மனு தாக்கல் செய்ய வாய்ப்புள்ளது" எனத் தெரிவித்துள்ளது.
11:22 November 09
ராமர் கோயில் கட்ட மூன்று மாதத்திற்குள் அயோத்தி அறக்கட்டளை அமைக்க வேண்டும் என மத்திய அரசுக்கு உச்ச நீதிமன்றம் உத்தரவிட்டுள்ளது. இந்த அறக்கட்டளையின் மேற்பார்வையின் கீழ் கோயில் கட்டவும் உத்தரவு பிறப்பிக்கப்பட்டுள்ளது. அயோத்திலேயே மசூதி கட்டிக்கொள்ள ஐந்து ஏக்கர் மாற்று இடம் வழங்கவும் உத்தரவு பிறப்பிக்கப்பட்டுள்ளது.
11:18 November 09
அயோத்தியின் 2.77 ஏக்கர் நிலத்தில் ராமர் கோயில் கட்ட உச்ச நீதிமன்றம் அனுமதி. மசூதி கட்டிக்கொள்ள இஸ்லாமியர்களுக்கு மாற்று இடம் வழங்கவும் அறக்கட்டளை அமைக்கவும் உச்ச நீதிமன்றம் உத்தரவிட்டுள்ளது.
11:07 November 09
மசூதி கட்டிக்கொள்ள இஸ்லாமியர்களுக்கு மாற்று இடம் வழங்க உச்ச நீதிமன்றம் உத்தரவு. 2010ஆம் ஆண்டு அலகாபாத் உயர் நீதிமன்றம் வழங்கிய தீர்ப்பு செல்லாது எனவும் அறிவிப்பு.
10:59 November 09
அயோத்தி வழக்கில் நீதிபதிகள் தீர்ப்பை வாசித்துவருகின்றனர். அதில் கூறப்பட்டுள்ளதாவது:
அயோத்தியில் ராமர் பிறந்தார் என்பது இந்துக்களின் உயரிய நம்பிக்கை. ராமர் அயோத்தியில் பிறந்தார் என்ற இந்துக்களின் நம்பிக்கையை சந்தேகத்திற்கு உட்படுத்த முடியாது. கடவுள் நம்பிக்கையின் அடிப்படையில் நிலத்தின் உரிமையாளர் யார் என்பதை தீர்மானிக்க முடியாது. மசூதிக்கு கீழ் இருந்ததாகக் கூறப்படும் கட்டடம் இஸ்லாமிய முறையிலான கட்டடம் இல்லை என்று தொல்லியல் துறை கூறுகிறது. வரலாறு, மதம், சட்டம் என பலவற்றை கடந்து அயோத்தி வழக்கில் உண்மை பயணித்துள்ளது. 12ஆவது நூற்றாண்டில் இருந்ததாகக் கோயில் அமைப்பு குறித்து தொல்லியல் துறை சரியான விளக்கத்தை அளிக்கவில்லை.
சர்ச்சைக்குரிய இடத்தில் இந்துக்கள் வழிபாடு நடத்தியதற்கும் இஸ்லாமியர்கள் தொழுகை நடத்தியதற்கும் ஆதாரங்கள் உள்ளன. மசூதி கட்டுவதற்காக கோயில் இடிக்கப்பட்டது என்று தொல்லியல் துறை கூறவில்லை. கட்டுமானம் இருக்கிறது என்பதற்காக அந்த இடத்திற்கு உரிமை கோர முடியாது.
இவ்வாறு அதில் தெரிவிக்கப்பட்டுள்ளது.
10:38 November 09
அயோத்தி வழக்கில் ஷியா வக்பு வாரியம், நிர்மோஹி அகாரா ஆகிய அமைப்புகள் சார்பாக தொடரப்பட்ட மனுக்களை உச்ச நீதிமன்றம் தள்ளுபடி செய்துள்ளது.
அயோத்தி வழக்கில் ஷியா வக்பு வாரியத்தின் மனுவை தள்ளுபடி செய்தும், நிர்மோஹி அகாரா அமைப்பு சார்பாக தொடரப்பட்ட மனுவை நிராகரித்தும் நீதிபதிகள் தீர்ப்பை வாசித்துவருகின்றனர்.
அயோத்தி வழக்கு குறித்து நீதிபதிகள், "பாபர் மசூதி, பாபர் ஆட்சியில்தான் கட்டப்பட்டுள்ளது என்பதை ஏற்றுக்கொள்கிறோம். இறை நம்பிக்கைக்குள் செல்வது நீதிமன்றத்திற்கு தேவையற்றது எனக் கருதுகிறோம். பாபர் மசூதி எப்போது கட்டப்பட்டது என்பதற்கு துல்லியமாக ஆதாரம் ஏதும் இல்லை.
காலி இடத்தில் பாபர் மசூதி கட்டப்படவில்லை என்பது தெரியவந்துள்ளது. இந்திய தொல்லியல் துறை கொடுத்த ஆதாரங்கள் ஆராயப்பட்டன. 12ஆவது நூற்றாண்டில் கட்டப்பட்ட கோயில் இருந்ததாக இந்திய தொல்லியல் துறை தெரிவித்துள்ளது. 12, 16 ஆம் நூற்றாண்டுக்கு இடையே அயோத்தியில் சர்ச்சைக்குரிய இடத்தில் என்ன இருந்தது என்பது குறித்த தெளிவான ஆதாரம் இல்லை" எனத் தெரிவித்தனர்.
