பெண்ணை காரில் கடத்த முயன்ற கும்பல்!

ஜெய்ப்பூர்: ராஜஸ்தான் மாநிலத்தில் சாலையில் நடந்து சென்ற பெண்ணை காரில் கடத்த முயன்ற கும்பல் குறித்து காவல் துறையினர் விசாரணை நடத்தி வருகின்றனர்.

ராஜஸ்தான் மாநிலம் தோல்பூர் மாவட்டத்தின் பாரி என்ற இடத்தில் 30 வயது பெண் ஒருவர் வேலைக்குச் சென்றுகொண்டிருந்தார். அப்போது, அவரை பின் தொடர்ந்து ஒரு கார் வந்துள்ளது.

இந்நிலையில், காரிலிருந்த ஐந்து பேர் கொண்ட கும்பல் அப்பெண்ணை கடத்த முயன்றுள்ளனர். இதனைக் கண்ட அக்கம்பக்கத்தினர் அந்தப் பெண்ணை கடத்தல் கும்பலிடமிருந்து மீட்டனர்.

உடனடியாக இது குறித்து தகவலறிந்து சம்பவ இடத்திற்கு வந்த காவல் துறையினர் அப்பெண்ணிடம் விசாரணை நடத்தினர். விசாரணையில், அப்பெண்ணின் உறவினரே கடத்தலில் ஈடுபட்டது தெரியவந்தது.

இச்சம்பவம் குறித்து வழக்குப்பதிவு செய்த காவல் துறையினர், கண்காணிப்புக் கேமராவில் பதிவான காட்சியை வைத்து விசாரணை நடத்தி வருகின்றனர்.