வடகிழக்கு மாநிலங்களில் அதிகரிக்கும் கரோனா தொற்று

வடகிழக்கு மாநிலங்களான அசாம், திரிபுரா, மணிப்பூர் மேகாலயா, மிசோரம் ஆகிய மாநிலங்களில் கரோனா நோய் தொற்று அதிகரித்துவருவது கவலை அளிக்கிறது.

நாடு முழுவதும் கரோனா வைரஸ் பாதிப்பு தொடர்ச்சியாக அதிகரித்துவருகிறது. லாக்டவுன் தற்போது நான்காவது கட்டத்தை எட்டியுள்ள நிலையில், நாடு முழுவதும் பாதிப்பு குறைவான பகுதிகளில் கட்டுப்பாடுகள் தளர்த்தப்பட்டு போக்குவரத்து மெல்ல இயல்பு நிலைக்குத் திரும்பிவருகிறது.

இந்நிலையில் இந்தியாவின் வடகிழக்கு மாநிலங்களில் கரோனா நோய் தொற்று தற்போது அதிகரிக்கத் தொடங்கியது கவலை அளிப்பதாக அம்மாநில முதலமைச்சர்கள் தெரிவித்துள்ளனர்.

ஆரம்பத்தில் அங்கு கரோனா பாதிப்பு பெரிதும் பதிவாகாத நிலையில், கடந்த சில நாள்களாக தொற்று எண்ணிக்கை அதிகரித்துவருகிறது. கடந்த 24 மணி நேரத்தில் அசாம் மாநிலத்தில் 44 புதிய நோய் தொற்று பதிவாகியுள்ளது. அம்மாநிலத்தில் இதுவரை 185 பேர் கரோனாவால் பாதிக்கப்பட்டுள்ளனர்.

அதேபோல், மணிப்பூர் மாநிலத்தில் ஒரேநாளில் 18 பேருக்கு கரோனா பாதிப்பு ஏற்பட்டுள்ளதாகவும் மொத்த நோய் தொற்று எண்ணிக்கை 25 ஆக அதிகரித்துள்ளதாகவும் தெரிவித்துள்ளது. அதேபோல், திரிபுராவில் 170க்கும் மேற்பட்டோர் கரோனாவால் பாதிக்கப்பட்டுள்ளனர்.

சுகாதார கட்டமைப்பில் பின்தங்கிய மாநிலங்களான வடகிழக்கு மாநிலங்களில் கரோனா தொற்றை கட்டுப்படுத்தும் முயற்சியில் மத்திய சுகாதாரத் துறை அமைச்சகம் முழு வீச்சில் செயல்படவுள்ளதாக தெரிவிக்கப்பட்டுள்ளது.

இதையும் படிங்க:மத உணர்வுகளைப் புண்படுத்தியதாக காங்கிரஸ் தலைவர் கைது