இந்தோ - சீனா எல்லையான அஸ்ஸாமில் பாதுகாப்பு நிலையை ஆய்வு செய்த நரவனே!

டெல்லி : இந்தோ - சீனா எல்லையில் உள்ள பாதுகாப்பு நிலைமைகளை மறுஆய்வு செய்ய ராணுவ தலைமை ஜெனரல் மனோஜ் முகுந்த் நரவனே, தேஜ்பூரைத் தளமாகக் கொண்ட நான்கு கார்ப்ஸுக்கு அதிகாரப்பூர்வ பயணம் மேற்கொண்டுள்ளார்.

கிழக்கு லடாக்கில் சீனாவுடன் ஏற்பட்ட மோதலை அடுத்து எல்லைகளை உயர் எச்சரிக்கை அணுகலில் வைத்திருப்பது தொடர்பாக மூத்த ராணுவத் தளபதிகள், உயர் அலுவலர்கள் கலந்தாய்வு செய்ததாக பாதுகாப்புத் துறை வட்டாரங்கள் தகவல் தெரிவித்துள்ளன. இந்த சந்திப்பின்போது, இந்தியத் தேசத்தின் பிராந்திய ஒருமைப்பாட்டைப் பாதுகாப்பதில், படையினர் மேற்கொண்ட முயற்சிகளை பாராட்டியதாகவும், எல்லை பகுதிகளில் உயர் நிலை விழிப்புணர்வு மற்றும் தொழில் திறன் ஆகியவற்றை கடைப்பிடிக்க உதவும் அனைத்து நடவடிக்கைகளையும் ஊக்குவிப்பதாகவும் ஜெனரல் நரவனே தெரிவித்துள்ளதாக அறிய முடிகிறது.

நாட்டின் கிழக்குப் பகுதிகளில் துருப்புக்கள் மற்றும் ஆயுதங்களை நிலைநிறுத்துவது குறித்து கிழக்கு கட்டளைத் தளபதி லெப்டினென்ட் ஜெனரல் அனில் சவுகான் ராணுவத் தலைமை ஜெனரல் நரவனேவுக்கு விரிவான விளக்கத்தை அளித்தார்.

இது தொடர்பாக பாதுகாப்பு அமைச்சகம் வெளியிட்டுள்ள குறிப்பில், "கிழக்கு லடாக்கில் சீனாவுடனான பதற்றமான சூழலை அடுத்து ​​அருணாச்சல், சிக்கிம் மாநிலங்களில் ஏறத்தாழ 3,500 கி.மீ நீளமுள்ள எல்லை கட்டுப்பாட்டு கோடுகளில் பாதுகாப்புப் பணிகளில் இந்திய துருப்புக்களை கணிசமாக அதிகரித்துள்ளது. கிழக்கு அரங்கில் நிலவும் பாதுகாப்பு நிலைமை மற்றும் செயல்பாட்டுத் தயார்நிலை ஆகியவற்றை குறித்து மதிப்பாய்வு செய்யப்பட்டுள்ளது.

அருணாச்சலப் பிரதேசத்தில் வான்வெளியைக் கவனிக்கும் முக்கிய தளங்களில் இந்திய விமானப்படை (ஐ.ஏ.எஃப்) கூடுதல் போர் விமானங்கள் மற்றும் தாக்குதல் ஹெலிகாப்டர்களை நிறுத்தியுள்ளது" என தெரிவிக்கப்பட்டுள்ளது.

கிழக்கு லடாக்கின் சர்ச்சைக்குரிய கல்வான் பள்ளத்தாக்கு பகுதியில் கடந்த ஜூன் 15ஆம் தேதி இந்தியா - சீனா இடையேயான மோதலை அடுத்து இருநாடுகளும் பல சுற்று ராஜதந்திர மற்றும் ராணுவ பேச்சுவார்த்தைகளை நடத்தியுள்ளன. கிழக்கு லடாக்கின் அனைத்து பகுதிகளில் இருந்தும் சீன ராணுவம் தனது படைகளை விரைவாக வெளியேற்ற வேண்டும் என இந்திய தரப்பு வலியுறுத்தியது.

அதனைத் தொடர்ந்து, இரண்டாவது சுற்று பேச்சுவார்த்தை ஜூன் 22 அன்று நடந்தது. ஜூன் 30ஆம் தேதி நடந்த மூன்றாவது சுற்று ராணுவப் பேச்சுவார்த்தையில், இரு தரப்பினரும் படிப்படியாக வெளியேறுவதை முன்னுரிமையாக ஒப்புக் கொண்டனர். தேசிய பாதுகாப்பு ஆலோசகர் அஜித் தோவலுக்கும் சீன வெளியுறவு அமைச்சர் வாங் யிக்கும் இடையில் கிட்டத்தட்ட இரண்டு மணி நேர தொலைபேசி உரையாடலுக்கு ஒரு நாள் கழித்து ஜூலை 6ஆம் தேதி துருப்புக்களை வெளியேற்றுவதற்கான முறையான செயல்முறை தொடங்கியுள்ளது.