சுதந்திரக் காற்றை சுவாசிக்கவுள்ள மருத்துவர் கஃபில் கான் : திரும்பப் பெறப்படும் தேசிய பாதுகாப்பு சட்டம்

லக்னோ : குடியரிமை திருத்த சட்டத்திற்கு எதிரான போராட்டத்தின்போது, உத்தரப் பிரதேசத்தை சேர்ந்த மருத்துவர் கஃபில் கான் மீது சர்ச்சைக்குரிய கருத்துகள் தெரிவித்ததாக குற்றச்சாட்டுகள் முன்வைக்கப்பட்டு, சிறையில் அடைக்கப்பட்ட நிலையில், அலகாபாத் உயர் நீதிமன்றம் அவருக்கு நிபந்தனையற்ற பிணை வழங்கி உத்தரவிட்டுள்ளது.

கடந்த 2019ஆம் ஆண்டு, டிசம்பர் 10ஆம் தேதி குடியுரிமை திருத்தச் சட்டத்திற்கு எதிரான போராட்டம், உத்தரப் பிரதேசத்தில் உள்ள அலிகார் முஸ்லிம் பல்கலைக்கழகத்தில் நடைபெற்றது. இதில், கலந்து கொண்ட மருத்துவர் கஃபில் கான் வன்முறையைத் தூண்டும் விதமாக பேசியதாகக் குற்றச்சாட்டு எழுப்பப்பட்டது. இதையடுத்து, கான் மீது தேசிய பாதுகாப்புச் சட்டத்தின் கீழ் வழக்குப் பதிவு செய்யப்பட்டு அவர் சிறையில் அடைக்கப்பட்டார்.

இதற்கிடையே, கானை விடுவிக்கக் கோரி அவரின் தாயார் பர்வீன், அலகாபாத் உயர் நீதிமன்றத்தில் மனு தாக்கல் செய்தார். மனுவை விசாரித்த நீதிபதிகள் மனோஜ் மிஸ்ரா, தீபக் வர்மா ஆகியோர் கொண்ட அமர்வு, மத்திய, மாநில அரசுகள் பதிலளிக்க உத்தரவு பிறப்பித்தது. இந்நிலையில் இன்று (செப். 1) நடைபெற்ற விசாரணையில், கஃபில் வன்முறையைத் தூண்டும் விதமாக பேசவில்லை என நீதிமன்றம் கருத்து தெரிவித்து அவருக்கு பிணை வழங்கியது.

கஃபீல் கானுக்கும் உத்தரப் பிரதேச அரசுக்கும் ஏற்கனவே மோதல் போக்கு இருந்துள்ளது. உத்தரப் பிரதேச மாநிலம் கோரக்பூர் பகுதியில் உள்ள மருத்துவமனையில் குழந்தைகள் உயிரிழந்த சம்பவத்தின்போது அங்கு தலைமை மருத்துவராக பணியாற்றியவர் கஃபீல் கான், குழந்தைகள் உயிரிழப்புக்கு மருத்துவமனையில் நிகழ்ந்த மின்வெட்டு, ஆக்ஸிஜன் சிலிண்டர் தட்டுப்பாடுதான் காரணம் என்று அறிக்கை கொடுத்தது அரசுத் தரப்பைக் கோபப்படுத்தியது. இதன் காரணமாக யோகி ஆதித்தியநாத் தலைமையிலான உத்தரப் பிரதேச அரசு இவ்வாறு நடவடிக்கைகளை எடுத்து வருவதாக எதிர்க்கட்சி உள்ளிட்ட பலரும் குற்றம்சாட்டி வருகின்றனர்.

இதையும் படிங்க: அஸ்ஸாம் முன்னாள் முதலமைச்சருக்கு செயற்கை சுவாசம் மூலம் கரோனா சிகிச்சை!