நடிகர் சுஷாந்த் சிங் மரணம் குறித்து மனம் திறந்த எய்ம்ஸ் மருத்துவர்!

மும்பை: நடிகர் சுஷாந்த் சிங் ராஜ்புத் மரணம் கொலையல்ல; தற்கொலை என்றே உடற்கூறாய்வு சோதனையில் கண்டறியப்பட்டுள்ளதாக எய்ம்ஸ் மருத்துவர் குழு அறிக்கை வெளியிட்டுள்ளது.

கடந்த ஜூன் மாதம் 14ஆம் தேதியன்று மகாராஷ்டிரா மாநிலம் மும்பையில் உள்ள குடியிருப்பு ஒன்றில் தூக்கில் தொங்கிய நிலையில் நடிகர் சுஷாந்த் சிங்கின் உடல் கண்டெடுக்கப்பட்டது.

சுஷாந்தின் மரணத்தில் மர்மம் இருப்பதாக கூறிய அவரது தந்தை கே.கே.சிங்கின் வேண்டுகோளை ஏற்று உச்ச நீதிமன்றம் மத்திய குற்றப்புலனாய்வுத் துறையின் வசம் ஒப்படைக்க உத்தரவிட்டது. தற்போது அந்த வழக்கு விசாரணையை சி.பி.ஐ. அலுவலர்கள் மேற்கொண்டு வருகின்றனர்.

இதனிடையே, சுஷாந்த் சிங்கின் உடற்கூறாய்வு பரிசோதனை அறிக்கையை ஆய்வு செய்ய எய்ம்ஸ் மருத்துவமனை தடயவியல் துறை தலைவர் மருத்துவர் சுதிர் குப்தா தலைமையில் 7 பேர் கொண்ட குழு அமைக்கப்பட்டது.

அந்தக் குழுவானது, தனது இறுதி ஆய்வறிக்கையை சி.பி.ஐ.யிடம் இன்று ஒப்படைத்துள்ளது. இது தொடர்பாக ஆய்வுக் குழுவின் தலைவர் மருத்துவர் சுதிர் குப்தா, " அகில இந்திய மருத்துவ அறிவியல் நிறுவனத்தின் (எய்ம்ஸ்) தடயவியல் துறையின் மருத்துவர் குழு மேற்கொண்ட உடற்கூறாய்வு பரிசோதனையில் சுஷாந்த் சிங் ராஜ்புத்தின் மரணம் தற்கொலை தான் என உறுதிப்படுத்தப்பட்டுள்ளது. அவரது இறப்பு கொலையால் ஏற்படவில்லை.

தூக்கு போட்டதை தவிர அவரது உடலில் எந்தக் காயமும் இல்லை. உடல் மற்றும் ஆடையில் போராடியதற்கான அல்லது சண்டையிட்டதற்கான எந்த அறிகுறியும் இல்லை.

மும்பை (எஃப்.எஸ்.எல்) தடயவியல் அறிவியல் அறிக்கையிலும், எய்ம்ஸ் நச்சுயியல் ஆய்வகத்தின் ஆய்வறிக்கையிலும் சொல்லப்பட்டது போன்றே எங்களது அறிக்கையிலும் சுஷாந்த் கழுத்தில் தூக்குபோட்டதற்கான அடையாளம் மட்டுமே அடையாளம் காணப்பட்டது.

அவரது உடலில் வேறு எந்த இடத்திலும் காயமோ அடியோ ஏற்பட்டதாக தெரியவில்லை. அவரது குடும்பத்தினர் சார்பாக வாதிடும் வழக்குரைஞர் சொல்வது போல அவர் விஷம் வைத்தோ அல்லது கழுத்தை நெரித்தல் போன்ற எந்தவொரு துன்புறுத்தலாலோ உயிரிழக்கவில்லை.

நாங்கள் எங்களது இறுதி அறிக்கையை சி.பி.ஐ., அலுவலகத்தில் அளித்துவிட்டோம். இந்த வழக்கு நீதிமன்ற விசாரணைக்குள் இருப்பதால் இது குறித்து இன்னும் விரிவாக பேச முடியாது. மருத்துவ ரீதியிலான விவரங்களை வழங்க முடியாது" எனத் தெரிவித்தார்.