பாகிஸ்தான் திடீர் தாக்குதல்.. ஆப்கன் மக்கள் 15 பேர்‌ உயிரிழப்பு!

காபூல்: எல்லையில் பாகிஸ்தான் ராணுவம் நடத்திய தாக்குதலில் பொதுமக்கள் 15 பேர் கொல்லப்பட்டது மட்டுமின்றி, 60 பேருக்கு காயம் ஏற்பட்டுள்ளதாக ஆப்கானிஸ்தான் தகவல் வெளியிட்டுள்ளது

பாகிஸ்தான்-ஆப்கானிஸ்தான் எல்லைப் பகுதியில் அசாதாரணமான சூழல் நிலவிவருகிறது. அவ்வப்போது இரு நாட்டு ராணுவப் படைகளும் தாக்குதல் நடத்திக் கொள்வது வாடிக்கையாக உள்ளது. பாகிஸ்தான் தனது 2,500 கிமீ எல்லையைச் சுற்றி வேலி ஒன்றை 2017ஆம் ஆண்டு அமைக்க தொடங்கியது.

இதன் காரணமாக இரு தரப்பிற்கு இடையே மோதல் வெடிக்க தொடங்கியது. பயங்கரவாதிகள் ஊடுருவுவதைத் தடுக்க வேலி அவசியம் என்பதில் பாகிஸ்தான் உறுதியாக இருந்தது. இரு நாட்டின் பயங்கரவாதிகளும் வெவ்வேறு நாடுகளில் தஞ்சம் புகுந்து கொள்வதாகவும் குற்றச்சாட்டு எழுந்தது. இந்நிலையில், பாகிஸ்தான் ராணுவம் நடத்திய திடீர் தாக்குதலில் பொதுமக்கள் 15 பேர் கொல்லப்பட்டதாக ஆப்கானிஸ்தான் ராணுவம் தகவல் வெளியிட்டுள்ளது

இதுகுறித்து வெளியிடப்பட்டுள்ள அறிக்கையில், ”நேற்று (ஜூலை 30) சாமன்-ஸ்பின் பகுதியில் பாகிஸ்தான் ராணுவத்திற்கும் ஆப்கானிஸ்தான் ராணுவப் படைக்கும் மோதல் ஏற்பட்டுள்ளது. அப்போது, அப்பகுதியில் விழாவிற்காகக் கூடியிருந்த பொதுமக்கள் 15 பேர் கொல்லப்பட்டனர்.

சுமார் 60க்கும் மேற்பட்ட மக்கள் பலத்த காயமடைந்து மருத்துவமனையில் சிகிச்சைக்காக அனுமதிக்கப்பட்டுள்ளனர். இத்தகைய தாக்குதல் தொடர்ந்தால் ஆப்கானிஸ்தான் தக்க பதிலடி கொடுக்கும்” என்று குறிப்பிடப்பட்டுள்ளது.

முன்னதாக, ஆப்கானிஸ்தானின் வடகிழக்கு குனார் மாகாணத்தில் பாகிஸ்தான் நடத்திய ஏவுகணை தாக்குதலில் மூன்று பேர் கொல்லப்பட்டது குறிப்பிடத்தக்கது.