உ.பி.,யில் தொடரும் அவலம்: 4 வயது சிறுமிக்கு பாலியல் தொல்லை கொடுத்த உறவினர்!

4 வயது சிறுமிக்கு அவரது உறவினரே பாலியல் தொல்லை கொடுத்த சம்பவம் அதிர்ச்சியை ஏற்படுத்தியுள்ளது.

உத்தரப் பிரதேச மாநிலம் அலிகார் மாவட்டத்தில் உள்ள காய்ர் (khair) காவல் எல்லைக்குட்பட்ட பகுதியில் 4 வயது சிறுமியை உறவினர் ஒருவர் பாலியல் வன்புணர்வு செய்துள்ளார்.

இது தொடர்பாக காய்ர் காவல் துறை வழக்குப்பதிவு செய்து விசாரணை மேற்கொண்டு வருகின்றனர். பாதிக்கப்பட்ட சிறுமி தற்போதுமருத்துவமனையில் அனுமதிக்கப்பட்டு சிகிச்சை பெற்று வருவதாக காவல் துறையினர் தெரிவிக்கின்றனர். இந்த சம்பவத்தில் தொடர்புடையவரை காவல் துறையினர் தீவிரமாகத் தேடி வருகின்றனர்.

இதனிடையே, புலந்த்ஷெஹர் மாவட்டத்தைச் சேர்ந்த 16 வயது மதிக்கத்தக்க சிறுமியை பாலியல் வன்கொடுமைக்குள்ளாக்கிய மூவர் மீது காவல் துறையினர் வழக்குப் பதிவு செய்துள்ளனர்.

அந்த சிறுமியின் உடல்நிலை தொடர்ந்து மோசமானதை அடுத்து சிறுமியின் பெற்றோர் மருத்துவரை அணுகியுள்ளனர். அப்போது சிறுமி நான்கு மாதம் கர்ப்பமாக இருப்பது தெரிய வந்துள்ளது.

இதையடுத்து மேற்கொள்ளப்பட்ட விசாரணையில் சிறுமியின் குடும்பத்திற்கு பழக்கப்பட்ட மூவர் சிறுமிக்கு தொடர் பாலியல் தொந்தரவு கொடுத்தது தெரிய வந்தது.

இதையடுத்து, இதில் தொடர்புடைய மூவரில் இருவரை காவல் துறையினர் கைது செய்து விசாரணை நடத்திவருகின்றனர்.