பெங்களூரு: கர்நாடக மாநிலத்தில் சிறுமிக்கு போதைப்பொருள் கொடுத்து பாலியல் வன்கொடுமை செய்ய முயன்றதாக, 73 வயது முதியவரை சிறுமியின் குடும்பத்தினர் அடித்துக்கொன்ற சம்பவம் அதிர்ச்சியை ஏற்படுத்தியுள்ளது.
இந்தச் சம்பவம் குறித்து காவல்துறை அதிகாரிகள் கூறுகையில், ”முதற்கட்ட விசாரணையில், தமிழ்நாட்டைச் சேர்ந்த குப்பண்ணா என்பவர் நகரின் பாபுசாபாளையத்தில் பல ஆண்டுகளாக வசித்து வந்தார். நேற்று மாலை வீட்டின் அருகே வெளியில் உலர வைக்கப்பட்டிருந்த பள்ளிச் சீருடையை எடுக்க வந்த, முதியவரின் வீட்டிற்கு அருகில் 16 வயது சிறுமியிடம் குப்பண்ணா பேசியதாகக் கூறப்படுகிறது.
பின்னர், போதைப்பொருளைக் கொடுத்து, சிறுமி அரை மயக்கத்தில் இருந்தபோது அவரை வீட்டிற்கு அழைத்துச்சென்று பாலியல் வன்கொடுமை செய்ய முயன்றதாகத் தெரிகிறது. மாலையில் வெளியே சென்ற மகள் வீட்டிற்கு வராததைக் கண்டு கவலையடைந்த பெற்றோர், அனைத்து இடங்களிலும் தேடினர்.
சிறிது நேரம் கழித்து, அவர்கள் முதியவரின் வீட்டிற்கு வந்தபோது, அந்தப் பெண் அரை மயக்கத்தில் இருப்பதைக் கண்டனர். பின்னர் சிறுமி நடந்த சம்பவம் குறித்து பெற்றோரிடம் கூறியுள்ளார். இதனால் ஆத்திரமடைந்த குடும்பத்தினர் முதியவரை அடித்துள்ளனர்.
இதையடுத்து, ஹென்னூர் காவல் நிலையத்தில் பெற்றோர் புகார் அளித்தனர். புகாரின் பேரில் வழக்குப்பதிவு செய்து விசாரணைக்காக, முதியவரின் வீட்டுக்குச் சென்று பார்த்தபோது, அவர் மயங்கிக் கிடந்தார். பின்னர் உள்ளூர் மருத்துவமனையில் அனுமதிக்கப்பட்ட போது அவர் ஏற்கெனவே இறந்துவிட்டதாக டாக்டர்கள் தெரிவித்தனர்.
எனவே, இந்தச் சம்பவம் தொடர்பாக ஹென்னூர் காவல் நிலையத்தில் 2 வழக்குகள் பதிவு செய்யப்பட்டுள்ளன. முதியவர் கொலை வழக்கில் 3 பேர் கைது செய்யப்பட்டு தொடர்ந்து விசாரணை மேற்கொள்ளப்பட்டு வருகிறது” எனத் தெரிவித்தனர்.
இதையும் படிங்க:ஓடும் காரில் தாய்க்கு பாலியல் தொல்லை; 10 மாத குழந்தையை வெளியே வீசிய கொடூரம்!
