மத்திய இணை அமைச்சர் முரளீதரன் வீட்டில் மர்மநபர்கள் தாக்குதல்!

திருவனந்தபுரத்தில் உள்ள மத்திய இணை அமைச்சர் முரளீதரன் வீட்டில் மர்மநபர்கள் கற்களை வீசித் தாக்குதல் நடத்தியுள்ளனர். இது தொடர்பாக போலீசார் விசாரணை நடத்தி வருகின்றனர்.

திருவனந்தபுரம்: கேரள மாநிலம் திருவனந்தபுரத்தில் பாஜக மூத்த தலைவரும், மத்திய இணை அமைச்சருமான முரளீதரன் வீட்டில் நேற்றிரவு(பிப்.8) மர்மநபர்கள் தாக்குதல் நடத்தியுள்ளனர். வீட்டின் கதவுகள், ஜன்னல்கள் கல்லால் அடித்து உடைக்கப்பட்டுள்ளன. இரவில் தாக்குதல் நடந்தபோது அமைச்சர் வீட்டில் இல்லை எனத் தெரிகிறது.

இந்த தாக்குதல் சம்பவம் தொடர்பாக அறிந்த போலீசார், தடயவியல் குழுவினருடன் சம்பவ இடத்துக்குச் சென்று ஆய்வு செய்தனர். மர்மநபர்கள் வீட்டின் பின்பக்கம் வழியாக வந்து தாக்குதல் நடத்தியிருக்கலாம் என கூறப்படுகிறது. இந்தச் சம்பவம் தொடர்பாக போலீசார் விசாரணை மேற்கொண்டு வருகின்றனர்.

இதனிடையே தாக்குதல் சம்பவத்துக்கு போலீசாரின் அலட்சியமே காரணம் என பாஜகவினர் குற்றம் சாட்டியுள்ளனர். கேரள போலீசார் மத்திய அமைச்சருக்கு உரிய பாதுகாப்பு வழங்கவில்லை என்றும் குற்றம் சாட்டினர். தாக்குதல் நடத்தியவர்கள் யார்? என்றும், இதன் பின்னணியில் அரசியல்வாதிகள் யாரேனும் உள்ளனரா? என்பது குறித்தும் போலீசார் விசாரணை நடத்த வேண்டும் என பாஜகவினர் வலியுறுத்தினர்.