டேராடூன்: உத்தரகாண்ட் மாநிலத்தில் கடந்த 19 ஆண்டுகளில், 4 ஆயிரத்துக்கும் மேற்பட்ட பெண்கள் பாலியல் வன்கொடுமைக்குள்ளாகியிருப்பது தகவல் அறியும் உரிமை சட்டத்தின் கீழ் தெரியவந்துள்ளது. அதன்படி, கடந்த 19 ஆண்டுகளில் 3 ஆயிரத்து 956 பாலியல் வன்கொடுமை வழக்குகள் பதிவு செய்யப்பட்டுள்ளன. அதுமட்டுமல்லாது 19 ஆசிட் வீச்சு வழக்குகளும் பதிவாகியுள்ளன.
தகவல் அறியும் உரிமை சட்டத்தின் கீழ் ஹல்த்வானியைச் சேர்ந்த ஹேமந்த் கோனியா விண்ணப்பித்ததன் மூலம், கடந்த 2000-2019 காலகட்டத்தில், பாலியல் வன்கொடுமைக்குள்ளாகிய நபர்களுக்கான நிதியுதவியாக, மாநில அரசால் இதுவரை 4 கோடியே 81 லட்சம் ரூபாய் வழங்கப்பட்டுள்ளது தெரியவந்துள்ளது. அதேபோல், ஆசிட் வீச்சால் பாதிக்கப்பட்ட பெண்களுக்கு 17 லட்சத்து 90 ஆயிரம் ரூபாய் வரை நிதியுதவி வழங்கப்பட்டுள்ளது.