சர்வாதிகாரம் வீட்டில் செய்யுங்கள், பொதுவெளியில் கூடாது - அஜித் பவார் விளாசல்

மசூதிகளில் கூம்பு ஒலி பெருக்கிகளை நீக்கக்கோரிய விவகாரத்தில், மகாராஷ்டிரா துணை முதலமைச்சர் அஜித் பவார், ராஜ் தாக்கரேவை கடுமையாக தாக்கி பேசியுள்ளார். அரசுக்கு கட்டளையிடும் வகையில் யாரும் பேசக்கூடாது என்றும் தெரிவித்துள்ளார்.

மகாராஷ்டிரா: மகாராஷ்டிராவில் உள்ள மசூதிகளில் ஒலிபெருக்கிகளை நீக்கும்படி, மகாராஷ்டிரா நவநிர்மான் சேனை தலைவர் ராஜ் தாக்கரே அரசுக்கு மிரட்டல் விடுக்கும் வகையில் பேசியிருந்தார். மே 3ஆம் தேதிக்குள் மசூதிகளில் உள்ள ஒலிப்பொருக்கிகளை நீக்காவிட்டால், இந்துக்கள் அனைவரும் மசூதி முன்பு குவிந்து, ஹனுமன் சாலிசா பாடுவோம் என எச்சரித்திருந்தார்.

இந்தச் சம்பவம் நாடு முழுவதும் அதிர்வலையை ஏற்படுத்தியது. இதுதொடர்பாக ராஜ் தாக்கரே மீது வழக்குப்பதிவு செய்யப்பட்டுள்ளது. இந்த நிலையில், மும்பையில் செய்தியாளர்களுக்குப் பேட்டியளித்த மகாராஷ்டிரா துணை முதலமைச்சர் அஜித் பவார், "அரசுக்கு கட்டளையிடும் வகையில் யாரும் பேசக்கூடாது என்று தெரிவித்தார்.

சர்வாதிகாரம் செய்யும் வகையில் பேச வேண்டும் என்றால், அவரவர் வீட்டில் உள்ளவர்களிடம் பேசிக் கொள்ளுங்கள், ஆனால் பொதுவெளியில் அவ்வாறு பேசக் கூடாது என்று தெரிவித்தார். அரசியலமைப்புச் சட்டப்படியே அரசாங்கம் நடத்தப்படுகிறது, சட்டத்தின் முன்பு அனைவரும் சமம் என்பதை நினைவில் கொள்ள வேண்டும் என்றும் தெரிவித்தார்.

அனைத்து மதத்தினரும் தங்களது வழிபாட்டுத் தலங்களில் ஒலிபெருக்கி வைத்துக் கொள்ள அனுமதி அளிக்கப்பட்டுள்ளது என்றும், ஒலி மாசு ஏற்படாத வகையில் உச்சநீதிமன்றம் குறிப்பிட்ட டெசிபெல் அளவில் ஒலிப்பெருக்கியை பயன்படுத்திக் கொள்ளலாம் என்றும் தெரிவித்தார்.

மத ரீதியான தூண்டலுக்கு மக்கள் யாரும் இரையாக வேண்டாம் என்றும், மாநிலத்தில் சட்டம், ஒழுங்கு மற்றும் மத நல்லிணக்கம் நிலைத்திருப்பதை மக்கள்தான் உறுதி செய்ய வேண்டும் என்றும் குறிப்பிட்டார். அதேநேரம் முறையாக அனுமதி பெறாமல் ஒலி பெருக்கியை பயன்படுத்தினால் கடும் நடவடிக்கை எடுக்கப்படும் என்றும், யாரும் சட்டத்தை கையில் எடுத்துக் கொள்ள கூடாது- சட்டம் தன் கடமையைச் செய்யும் என்றும் தெரிவித்தார்".