யாருக்காக ஷிண்டே வருகிறார்? யாரை மிரட்டுகிறார்கள்? - பாஜக அண்ணாமலைக்கு எதிராக சீறிப்பாய்ந்த கேசிஆர்!

தமிழ்நாட்டில் ஏக்நாத் ஷிண்டே உருவாக வாய்ப்புள்ளது என்று பாஜக தலைவர் அண்ணாமலை பேசியதற்கு, தெலங்கானா முதலமைச்சர் சந்திரசேகர ராவ் கண்டனம் தெரிவித்துள்ளார். அம்மாநில சட்டப்பேரவையில் பேசிய அவர் பாஜகவை கடுமையாக விமர்சித்தார்.

ஹைதராபாத்:2024ஆம் ஆண்டு மக்களவைத் தேர்தலை முன்னிட்டு, பாஜகவுக்கு எதிராக எதிர்க்கட்சிகளை ஒன்றிணைக்கும் பணியில் தெலங்கானா முதலமைச்சர் சந்திரசேகர ராவ் ஈடுபட்டுள்ளார். விரைவில் தேசிய கட்சி தொடங்கப்படும் என்று நேற்று(செப்.11) அறிவித்தார்.

இந்த நிலையில், தெலங்கானா சட்டப்பேரவையில் பேசிய முதலமைச்சர் சந்திரசேகர ராவ், மத்திய பாஜக அரசை கடுமையாக விமர்சித்தார். அப்போது பேசிய அவர், "மோடி அரசால் நாட்டில் ஜனநாயகம் என்பது கேலிக்கூத்தாகி வருகிறது. மக்களால் தேர்ந்தெடுக்கப்பட்ட அரசுகளை கவிழ்ப்பதே, பாஜகவின் பிரதானப் பணியாக மாறிவிட்டது. நாட்டில் இதுவரை 10 மாநில அரசுகள் கவிழ்க்கப்பட்டு, அங்கு சட்ட விரோதமாக பாஜக ஆட்சிக்கு வந்துள்ளது.

பாஜக அல்லாத கட்சிகள் ஆளும் அனைத்து மாநிலங்களிலும், ஏக்நாத் ஷிண்டேவை உருவாக்குவோம் என்று பாஜக தலைவர்கள் மிரட்டல் விடுக்கிறார்கள். தமிழ்நாட்டில் முதலமைச்சர் ஸ்டாலின் வெற்றி பெற்று ஓராண்டுதான் நிறைவடைந்துள்ளது. அதற்குள் அங்குள்ள பாஜக தலைவர் அண்ணாமலை, தமிழ்நாட்டில் ஏக்நாத் ஷிண்டே உருவாக வாய்ப்புள்ளது என்று பேசுகிறார்.

யாருக்காக ஷிண்டே வருகிறார்? யாரை மிரட்டுகிறார்கள்? இவ்வளவு பெரிய தேசம் எத்தனை அனுபவங்களை சந்தித்திருக்கிறது? லோக்நாயக் ஜெயப்பிரகாஷ் நாராயண் போல ஒருவர் கிளம்பினால், அரசியல் புரட்சி ஏற்பட்டு 40, 50 நாட்களுக்குள் பாஜக கொடி தூக்கி எறியப்படும். அதுதான் ஜனநாயகத்தின் சக்தி.

பிரதமர் மோடியின் ஆட்சிக் காலத்தில் மத்திய அரசில் ஏதாவது நல்லப்பணிகள் நடந்துள்ளதா? அரசியல் சாசன அமைப்புகளை ஜனநாயக விரோதமாகப் பயன்படுத்தி, மக்களால் உருவாக்கப்படும் அரசுகளை கவிழ்த்து வருகின்றனர். ஏற்கெனவே பத்து மாநில அரசுகள் கவிழ்க்கப்பட்டன, இது இன்னும் தொடரும். இதற்காக அவர்கள் அவமானப்பட வேண்டும்" என்று கூறினார்.