டெல்லி : இந்தியா கூட்டணியின் 4வது கட்ட ஆலோசனைக் கூட்டம் தலைநகர் டெல்லியில் உள்ள தனியார் உணவு விடுதியில் நடைபெற்ற ஆலோசனைக் கூட்டத்தில் தமிழ்நாடு முதலமைச்சர் மு.க.ஸ்டாலின், மேற்கு வங்கம் முதலமைச்சர் மம்தா பானர்ஜி, டெல்லி முதலமைச்சர் அரவிந்த் கெஜ்ரிவால், பீகார் முதலமைச்சர் நிதிஷ் குமார் உள்ளிட்ட 28 எதிர்க்கட்சித் தலைவர்கள் ஒன்று கூடி ஆலோசனை நடத்தினர்.
கூட்டத்தில் அடுத்த ஆண்டு நடைபெற உள்ள நாடாளுமன்ற தேர்தலில் பங்கேற்பது, தொகுதி பங்கீடு குறித்து ஆலோசனை மேற்கொள்ளப்பட்டதாக தெரிவிக்கப்பட்டு உள்ளது. மேலும், இந்திய கூட்டணியின் பிரதமர் வேட்பாளராக மல்லிகார்ஜூன கார்கேவை தேர்ந்தெடுக்க மேற்கு வங்க முதலமைச்சர் மம்தா பானர்ஜி மற்றும் டெல்லி முதலமைச்சர் அரவிந்த் கெஜ்ரிவால் முன்மொழிந்ததாக தெரிவிக்கப்பட்டு உள்ளது.
இருப்பினும் இதை ஏற்க மறுத்த மல்லிகார்ஜூன கார்கே தேர்தலில் வெற்றி பெறுவது முதல் பணியாக இருக்க வேண்டும் என்றும் அதன்பின் தலைமை குறித்து அலோசிக்கலாம் என்றும் தெரிவித்ததாக கூறப்பட்டு உள்ளது. இருப்பினும் இந்த விவகாரத்தில் இறுதி முடிவு கிட்டவில்லை எனத் தெரிவிக்கப்பட்டு உள்ளது.