கிடா விருந்தில் விபரீதம் - தொண்டையில் சிக்கிய எலும்பால் உயிரிழப்பு

தெலங்கானாவில் ஆட்டு எலும்பு தொண்டையில் சிக்கியதால் ஒருவர் உயிரிழந்த சம்பவம் பெரும் சோகத்தை ஏற்படுத்தியுள்ளது.

ஹைதராபாத்:தெலங்கானா மாநிலம் சூர்யாபேட்டை மாவட்டத்தை சேர்ந்த பூக்யா கோபி ஏப். 12ஆம் தேதி முத்தியாளம்மா பண்டிகையை கொண்டாடினார். இதனை முன்னிட்டு அம்மனுக்கு கிடா வெட்டி படையல் வைத்தார். இதையடுத்து கோபியும், குடும்பத்தினரும் ஒன்றாக அமர்ந்து ஆட்டுக்கறி விருந்தில் கலந்துகொண்டனர். அப்போது, கோபியின் தொண்டையில் ஆட்டின் எலும்பு சிக்கியது. இதன்காரணமாக அவருக்கு மூச்சுத் திணறல் ஏற்பட்டது.

உடனடியாக உறவினர்கள் அவரை மருத்துவமனைக்கு கொண்டு சென்றனர். ஆனால், அவர் சிகிச்சை பலனின்றி உயிரிழந்தார். பண்டிகை நாளில் இதுபோன்ற ஒரு சம்பவம் நிகழ்ந்தது அப்பகுதியில் சோகத்தை ஏற்படுத்தியுள்ளது.