ஹைதராபாத்: உலகம் முழுவதும் மிகவும் பிரபலமானதாகவும், விலை உயர்வானதாகவும் உள்ள ஹார்லி டேவிட்சன் பைக் வாங்குவது என்பது பெரும்பாலான பைக் ரைடர்களின் கனவாகும். இந்நிலையில் நேற்று ஹைதராபாத் ராமோஜி பிலிம் சிட்டியில் HOG பேரணி நடந்தது. இதில் பலர் கலந்து கொண்டனர்.
இந்தப் பேரணியில் பங்கேற்க, பைக்கை வாங்கிய பின், 7,000 ரூபாய் கொடுத்துப் பதிவு செய்ய வேண்டும். அவ்வாறு செய்பவர்களுக்கு கிரெடிட் கார்டு போன்ற உறுப்பினர் அட்டை வழங்கப்படுகிறது. நாடு முழுவதும் உள்ள அனைத்து ஹார்லி பைக்கரும் HOG எனப்படும் The Harley Owners Groupஇல் உறுப்பினர் ஆகலாம். ஹார்லி உரிமையாளர்கள் குழுமம் 2009இல் தொடங்கப்பட்டது. அதன் பின்னர் அவர்கள் ஒவ்வொரு ஆண்டும் ஐந்து முறை நாட்டின் பல்வேறு பகுதிகளில் பேரணிகளை நடத்துகின்றனர்.
உலகமெங்கும் ஹார்லி டேவிட்சன் சொகுசு பைக் எல்லோரும் விரும்பும் ஒரு பைக்காகும். ஆனால், அந்த பைக்கை வாங்குவது எளிதானது அல்ல. அதை வாங்குவதற்கு பெரும் பணத்தைச் செலவழிக்க வேண்டும். ஆனால், தங்களிடம் நல்ல வருமானம் உள்ள பல இளைஞர்கள், ராயல் பைக் ஓட்டும் அனுபவத்தை விரும்பி இந்த பைக்குகளை வாங்குகிறார்கள். இவ்வாறு ஹார்லி டேவிட்சன் பைக் வாங்கிய ரைடர்ஸ் நடத்தும் பேரணி, இந்த முறை ஹைதராபாத்தில் உள்ள ராமோஜி ஃபிலிம் சிட்டியில் நடந்தது. எந்த போக்குவரத்து நெரிசலும் இல்லாமல் உற்சாகமாக ஃபிலிம் சிட்டி வளாகத்தில் ரைடு சென்றனர்.
களைகட்டிய பேரணி : தென்னக ஹார்லி டேவிட்சன் உரிமையாளர்கள் குழுவின் (HOG) 9ஆவது பேரணிக்கான கொடியேற்றம் ராமோஜி ஃபிலிம் சிட்டியில் வெள்ளிக்கிழமையன்று நடந்தது. இதனைத்தொடர்ந்து நேற்று (ஆகஸ்ட் 28) நடந்த HOG பேரணி சிறப்பாக நடைபெற்றது.
ராமோஜி ஃபிலிம் சிட்டியில் ஹார்லி டேவிட்சன் பைக் ரைடு கொண்டாட்டம் நாடு முழுவதிலும் இருந்து ஹார்லி பைக்கர்கள் ஒரே இடத்தில் கூடி பைக்குகளை ஓட்டி மகிழ்ச்சியடைந்தனர். HOG என்பது ஹார்லி டேவிட்சன் பைக்கின் உரிமையாளர்கள் கொண்ட குழுவைக்குறிக்கும் சொல்லாகும். இது 2019 முதல் ஒவ்வொரு ஆண்டும் வெவ்வேறு இடங்களில் பேரணிகளை ஏற்பாடு செய்து வருகிறது.
இருப்பினும் கரோனா காரணமாக, கடந்த இரண்டு ஆண்டுகளாக இப்பேரணி நடைபெறவில்லை. ஆனால், இந்த ஆண்டு நடந்த 9ஆவது HOG பேரணி ராமோஜி ஃபிலிம் சிட்டியில் பிரமாண்டமாக நடத்தப்பட்டது. பேரணியில் பங்கேற்ற பெரும்பாலான பைக்கர்களில் பல்வேறு நிறுவனங்களில் பணிபுரியும் மேலாளர்கள், CEO-க்கள் மற்றும் மென்பொருள் பொறியாளர்கள் இருந்தனர். இந்நிகழ்ச்சியில் அனைவரும் தங்கள் உறவினர்களுடன் கலந்து கொண்டனர்.
இதன் உறுப்பினர்கள் நாடு முழுவதும் தெற்கு, கிழக்கு, வடக்கு மற்றும் மேற்கு ஆகியப்பகுதிகள் என மொத்தம் ஐந்து HOG மேலாண்மை குழுக்களைக் கொண்டுள்ளனர். பேரணிக்கு வரும் இருசக்கர வாகன ஓட்டிகள், தங்கள் நண்பர்களை சந்தித்து, இரண்டு நாட்கள் அவர்களுடன் நேரத்தைச் செலவிடுகின்றனர். இந்தப் பேரணியில் பங்கேற்பதற்காக ஹார்லி டேவிட்சன் பைக்கர்கள் வெகு தொலைவில் இருந்து வருகிறார்கள். ஆயிரக்கணக்கான கிலோமீட்டர்கள் பயணித்தாலும் களைப்பு இல்லை என்கின்றனர்.
இந்தப்பேரணியில் பெண் ரைடர்களும் பங்கெடுத்தது குறிப்பிடத்தக்கது. அவர்களுக்குத் தேவையான ஏற்பாடுகளை HOG நிர்வாக நிறுவனம் செய்துள்ளது. பேரணியில் வெற்றி பெற்றவர்களுக்கு சிறப்புப் பரிசுகள் வழங்கப்பட்டன.
இதையும் படிங்க:ஓணம் பண்டிகை... அரசு ஊழியர்களுக்கு ரூ.4,000 போனஸ்... கேரள அரசு அறிவிப்பு...
