798 மருத்துவர்கள் உயிரிழப்பு!

கரோனா இரண்டாவது அலையில் 798 மருத்துவர்கள் உயிரிழந்துள்ளனர் என இந்திய மருத்துவர் சங்கம் தெரிவித்துள்ளது.

டெல்லி : கரோனா இரண்டாம் அலை நாடு முழுக்க பெரும் உயிர்ச் சேதத்தை ஏற்படுத்தியது. நாடே மூச்சுவிட சிரமப்பட்டது. இந்நிலையில் 798 மருத்துவர்கள் இதுவரை உயிரிழந்துள்ளதாக இந்திய மருத்துவர் சங்கம் அதிர்ச்சி தகவலை தெரிவித்துள்ளது.

கரோனா இரண்டாவது அலை, டெல்டா பிளஸ் வைரஸ் என கோவிட்-19 அச்சுறுத்திவருகிறது. இதற்கிடையே கோவிட் இரண்டாம் அலையில் சிக்கி தற்போதுவரை 798 மருத்துவர்கள் உயிரிழந்துள்ளனர்.

டெல்லி முதலிடம்

இது குறித்து இந்திய மருத்துவர் சங்கம் வெளியிட்டுள்ள தகவலின்படி தலைநகர் டெல்லியில் அதிகப்பட்சமாக 128 மருத்துவர்கள் உயிரிழந்துள்ளனர். இதற்கு அடுத்த இடத்தில் பிகாரில் 115 மருத்துவர்கள் உயிரிழந்துள்ளனர்.

இந்திய மருத்துவர் சங்கம்

அடுத்து உத்தரப் பிரதேசத்தில் 79 மருத்துவர்களும், கேரளாவில் 24 மருத்துவர்களும், மகாராஷ்டிராவில் 23 மருத்துவர்களும் உயிரிழந்துள்ளனர். புதுச்சேரியை பொருத்தவரை உயிரிழப்பு 1ஆக உள்ளது.

மருத்துவர்கள் கோரிக்கை

இந்நிலையில், மருத்துவர்கள் மீதான வன்முறை சம்பவங்களும் அதிகரித்துவருகின்றன என இந்திய மருத்துவர் சங்கம் தெரிவித்துள்ளது.

இந்த விவகாரத்தில் பிரதமர் நரேந்திர மோடி தலையிட்டு, மருத்துவர்கள் மீதான வன்முறையில் ஈடுபடும் நபர்கள் மீது தொற்றுநோய் பாதுகாப்பு சட்டம் மற்றும் இந்திய தண்டனைச் சட்டத்தின் கீழ் நடவடிக்கை எடுக்க வேண்டும் எனவும், அவர்கள் மீது பிணையில் வெளியில் வரமுடியாதபடி வழக்குப்பதிவு செய்ய வேண்டும் எனவும் இந்திய மருத்துவர் சங்கத்தின் சார்பில் வலியுறுத்தப்பட்டுள்ளது.

மருத்துவர்கள்

முன்னதாக இந்திய மருத்துவர் சங்கம் (IMA) ஜூன் 25இல் வெளியிட்ட செய்திக்குறிப்பில், இதுவரை 776 மருத்துவர்கள் கரோனா இரண்டாவது அலையில் உயிரிழந்துள்ளதாக தெரிவிக்கப்பட்டிருந்தது குறிப்பிடத்தக்கது.

இதையும் படிங்க: கரோனா 2ஆம் அலையில் 730 மருத்துவர்கள் உயிரிழப்பு