உலியத்துக்கடவு - உப்பைப் பயன்படுத்தி பிரிட்டிஷ் சாம்ராஜ்யத்தை உலுக்கிய பூமி

இந்திய சுதந்திரப் போராட்டத்தில், ஒரு பகுதியான உப்பு சத்தியாகிரகத்தில், கேரள மாநிலத்தின் பங்கு குறித்தும், உப்பைப் பயன்படுத்தி பிரிட்டிஷ் சாம்ராஜ்யத்தை உலுக்கிய பூமியான உலியத்துக்கடவு குறித்தும் இத்தொகுப்பில் காணலாம்.

"இந்த கையளவு உப்பைக் கொண்டு, நான் பிரிட்டிஷ் சாம்ராஜ்யத்தின் அடித்தளத்தை அசைப்பேன்", 1930ஆம் ஆண்டு ஏப்ரல் மாதம் தண்டி கடற்கரையில் உப்பை கையில் ஏந்தியவாறு மகாத்மா காந்தி கூறிய வரிகள் இவை. அவரது கூற்று உண்மையாகிவிட்டது. சட்ட மறுப்பு இயக்கத்தின் ஒரு பகுதியாக, 1930 மார்ச் 12அன்று, காந்திஜி தொடங்கிய உப்புச் சத்தியாகிரகப் பேரணியை, நாடு முழுவதும் உள்ள இந்தியர்கள் இருகரம் நீட்டி வரவேற்றனர்.

1882ஆம் ஆண்டின் உப்புச் சட்டத்தின் மூலம் பிரிட்டிஷ் இந்தியாவில் உப்பு ஏகபோகமாக இருந்தது. காந்திஜியின் குறிக்கோள் இந்த ஏகபோகத்தை உடைத்து உப்பை உலகளாவியதாக ஆக்குவதாகும். மகாத்மா காந்தியின் அழைப்பின் பேரில் கேரளாவும் உப்புச் சத்தியாகிரகத்தில் பங்கேற்றது.

தண்டி யாத்திரையில் மலையாளிகள்...

தண்டி யாத்திரையின் போது காந்திஜியுடன் சி.கிருஷ்ணன் நாயர், டைட்டஸ், ராகவ் பொதுவால், ஷங்கர்ஜி, தபன் நாயர் ஆகியோர் பங்கேற்றனர். கேரளாவில் உப்புச் சத்தியாகிரக மையங்கள் கண்ணூரில் உள்ள பையனூர் மற்றும் கோழிக்கோட்டில் உள்ள பேப்பூர் ஆகும்.

கேரளாவில் முதன்முறையாக, கேரள காந்தி என்ற புனைப்பெயரால் அறியப்பட்ட கே.கேளப்பன் தலைமையில் பையனூரில் உப்புத் தயாரிக்கும் பணிகள் நடந்தன. பேப்பூரில் உப்புச் சத்தியாகிரகத்திற்கு முஹம்மது அப்துரஹ்மான் தலைமை தாங்கினார்.

வரலாறு படைத்த பையனூர்...

பையனூரில் ஆங்கிலேய அரசுக்கு எதிராக உப்புத் தயாரிப்புப் போராட்டம் உலியத்துக்கடவுப் பகுதியில் நடந்தது. இந்தப் போராட்டத்தை கே.கேளப்பன், மொயரத் சங்கர மேனன், சி.எச். கோவிந்தன் நம்பியார் ஆகியோர் வழிநடத்தினர்.

1930 மார்ச் 9அன்று வடகரையில் நடைபெற்ற காங்கிரஸ் கூட்டத்தில் சொல்லப்பட்ட தீர்மானங்கள், இப்போராட்டத்திற்கு அனுமதி அளித்தது. கோழிக்கோட்டில் இருந்து 32 பேர் கொண்டு புறப்பட்ட ஊர்வலத்திற்கு கே.கேளப்பன் தலைவராகவும், குஞ்சிராமன் நம்பியார் தளபதியாகவும் இருந்தனர்.

ஏப்ரல் 13, 1930அன்று கிருஷ்ணன் பிள்ளை பாடிய 'வாழ்க பாரத சமுதாயம்' என்ற ஆங்கிலேய எதிர்ப்பு கீதத்தை இடி சத்தம் போல் முழக்கமிட, ஊர்வலம் தொடங்கியது. இந்த ஊர்வலத்திற்கு மொயரத் குஞ்சி சங்கர மேனன், பி.குமரன் மற்றும் சி.எச். கோவிந்தன் வழியில் வரவேற்பு ஏற்பாடு செய்தார்.

ஏப்ரல் 21ஆம் தேதி பையனூரை வந்தடைந்த ஊர்வலம், மறுநாள் உலியத்கடவை வந்தடைந்தது. ஆங்கிலேயர்களின் சட்டத்தை மீறி முழக்கங்கள் மற்றும் தேசிய கீதங்கள் முழங்க, சுதந்திரப் போராட்ட வீரர்கள் உப்பு தயாரித்தனர். உலியத் கடவு - பையனூர் சம்பவம் கேரள சுதந்திரப் போராட்ட வரலாற்றில் ஒரு திருப்புமுனையாக அமைந்தது.

ஆங்கிலேயர்களின் அடக்குமுறை!

இதனால், ஆத்திரமடைந்த ஆங்கிலேயர்கள் பையனூரில் சத்தியாகிரக முகாம் மீது தாக்குதல் நடத்தி, ஆதரவாளர்களை அடித்து உதைத்தனர். கே.கேளப்பன் உள்ளிட்ட தலைவர்களை காவல் துறையினர் கைது செய்து சிறையில் அடைத்தனர்.

இது மக்களிடையே போராடும் எண்ணத்தைத் தூண்டியது. இதையடுத்து ஆயிரக்கணக்கான மக்கள் சுதந்திரப் போராட்டத்தில் பங்கேற்க ஆயத்தமாகினர். இதனைத் தொடர்ந்து கண்ணூர், தலச்சேரி மற்றும் மாவட்டத்தின் பிறப் பகுதிகளில் பரவலான போராட்டங்கள் நடந்தன. இதில் காங்கிரஸ் தொண்டர்கள் பலர் கைது செய்யப்பட்டனர்.

அங்கீகாரத்திற்கு போராடும் உலியத்துக்கடவு

நம் நாடு, உப்புச் சத்தியாகிரகத்தின் 90ஆவது ஆண்டு விழாவைக் கடந்த ஆண்டு கொண்டாடியது. இருப்பினும், புகழ்பெற்ற வரலாற்றுத் தலமான உலியத்துக்கடவு கவனிக்கப்படாமல், சமூக விரோதிகளின் கோட்டையாகவே உள்ளது.

உப்புச் சத்தியாகிரகத்தின் வரலாற்றுப் பதிவுகள், பையனூர் காந்தி ஸ்மிருதி அருங்காட்சியகத்தில் வைத்துள்ளனர். காந்தி அருங்காட்சியகத்தில், போராட்டத்தில் பங்கேற்றவர்களின் பெயர்கள் மற்றும் பிற விவரங்கள் அடங்கிய ஆவணங்கள் மற்றும் காவல் துறை தயாரித்த முதல் தகவல் அறிக்கையின் நகல்கள் ஆகியவை உள்ளன.

போராட்டக்காரர்கள் தாக்கப்பட்ட பழைய பையனூர் காவல் நிலையம், தற்போது காந்தி மியூசியமாக மாற்றப்பட்டுள்ளது. வரலாற்றுச் சிறப்புமிக்க உலியத்துக்கடவை பாதுகாக்க அலுவலர்கள் உடனடியாகத் தயாராக வேண்டும் என விடுதலைப் போராட்ட வீரர்களும், அப்பகுதி மக்களும் கோரிக்கை விடுத்துள்ளனர்.