கேட்டதோ நீட் விலக்கு; கிடைத்ததோ 4 நீட் தேர்வு மையங்கள்...!

நீட் தேர்வில் இருந்து விலக்கு அளிக்கக்கோரி அமைச்சர் மா.சுப்பிரமணியன், ஒன்றிய அமைச்சர் தர்மேந்திர பிரதானிடம் கோரிக்கை மனு அளித்தார். அந்தச் சந்திப்பிற்குப் பிறகு, தமிழ்நாட்டில் கூடுதலாக நான்கு நீட் தேர்வு மையங்கள் அமைக்கப்படும் என ஒன்றிய அமைச்சர் தெரிவித்துள்ளார்.

டெல்லி: தமிழ்நாட்டிற்கு நீட் தேர்வில் இருந்து விலக்கு அளிக்க திமுக தலைமையிலான அரசு பல்வேறு நடவடிக்கைகளை எடுத்து வருகிறது.

குறிப்பாக, ஓய்வுபெற்ற நீதிபதி ஏ.கே. ராஜன் தலைமையில் அமைக்கப்பட்ட குழு சாதக, பாதகங்கள் குறித்து ஆராய்ந்த அறிக்கையை நேற்று (ஜூலை 14) தமிழ்நாடு முதலமைச்சரிடம் சமர்ப்பித்துள்ளது.

செப்டம்பர் 12ஆம் தேதி இளநிலை மருத்துவப்படிப்பிற்கான நீட் தேர்வு அறிவிக்கப்பட்டுள்ள நிலையில், இந்த ஆண்டு தமிழ்நாட்டுக்கு விலக்கு பெறுவதற்கான நடவடிக்கைகளை அரசு எடுத்து வருகிறது.

இந்நிலையில் ஒன்றிய கல்வி அமைச்சர் தர்மேந்திர பிரதானை, தமிழ்நாடு சுகாதாரத்துறை அமைச்சர் மா.சுப்பிரமணியன் சந்தித்து நீட் தேர்வில் இருந்து தமிழ்நாட்டிற்கு விலக்கு அளிக்கக்கோரி கோரிக்கை மனு அளித்தார்.

ஆனால், மனு குறித்து ஒன்றிய அமைச்சர் தர்மேந்திர பிரதான் ஒரு கருத்தும் தெரிவிக்கவில்லை.

கூடுதல் சென்டர்கள்

இதுகுறித்து தர்மேந்திர பிரதான் தனது ட்விட்டர் பக்கத்தில் வெளியிட்டுள்ள பதிவில்,'கடந்த ஆண்டு தமிழ்நாட்டில் 14 நீட் தேர்வு மையங்கள் அமைக்கப்பட்டிருந்த நிலையில், கூடுதலாக இந்த வருடம் செங்கல்பட்டு, விருதுநகர், திண்டுக்கல், திருப்பூர் ஆகிய மாவட்டங்களையும் சேர்த்து மொத்தம் 18 மையங்கள் அமைக்கப்படும்' எனத் தெரிவித்துள்ளார்.