21 வயது இளம்பெண் ஐ.சி.சி.யின் பயிற்சியாளராக தேர்வாகி சாதனை!

ஒவ்வொரு விளையாட்டு வீரரும் தங்களது ஓய்வுக்குப் பின்னர், தாங்கள் விளையாடிய போட்டிகளில் இருந்து கிடைத்த அனுபவத்தைக் கொண்டு இளம் வீரர்களுக்கு ஊக்கம் அளிக்கும் பயிற்சியாளராக பிரவேசம் எடுக்கின்றனர். ஆனால், தெலங்கானா மாநிலத்தைச் சேர்ந்த இளம்பெண் தலைகீழ் நிலையாக தனது 21 வயதில் ஐ.சி.சி.யின் சர்வதேச பயிற்சியாளராக தேர்வாகி உள்ளார். அது குறித்து விவரிக்கிறது இந்த தொகுப்பு...

பூபாலபள்ளி(தெலங்கானா):தெலங்கானா மாநிலத்தைச் சேர்ந்தவர், புர்ரா லஸ்யா. தன் வாழ்நாள் சாதனை குறித்து அவரே விவரிக்கிறார்.

புர்ரா லஸ்யா கூறியதாவது, "எனது அப்பா புர்ரா ரமேஷ். பல்கலைக்கழக வாலிபால் விளையாட்டு வீரர். அம்மா சுனிதா தேசிய தடகள வீராங்கனை. இவர்களால் தான் விளையாட்டுத்துறையில் தனித்து விளங்கி சாதனைப் படைக்க வேண்டும் என்ற எண்ணம் எனது ரத்தத்தில் ஊறியதற்கு காரணம் எனக் கூறலாம்.

விளையாட்டு போட்டிகளில் கலந்து கொள்ள பெற்றோர் என்னை ஊக்குவித்தார்கள். சிறு வயதில் கிரிக்கெட் மீது அதீத ஆர்வம். பின்னாட்களில் அதுவே காதலாகவும் மாறத் தொடங்கியது. சிறு பெண்ணாக இருக்கும்போது எனது சகோதரர் மற்றும் அவனது நண்பர்களுடன் இணைந்து கிரிக்கெட் விளையாடுவேன்.

மேலும் உலகக்கோப்பை கிரிக்கெடை ஒருமுறை பார்த்தபோது, இனி நமக்கு வாழ்வில் கிரிக்கெட் மட்டும்தான் என முடிவுசெய்தேன். கிரிக்கெட் விளையாட்டில் வீரர்களுக்கு கிடைக்கும் புகழ் மற்றும் கைத்தட்டல் என்னையும் அந்த விளையாட்டிற்குள் இழுத்துச்சென்றது. அதனால், கிரிக்கெட் மீது அளவு கடந்த அன்பை வளர்த்துக் கொண்டு அதிகம் கற்கத் தொடங்கினேன்.

கிரிக்கெட்டில் எனது ஆர்வத்தை கண்ட அம்மா என்னை ஊக்குவிக்கத் தொடங்கினார்கள். அப்பா மாவட்ட நூலகத்தின் தலைவர் மற்றும் அம்மா சுனிதா மாவட்ட இளைஞர் விளையாட்டுத்துறை அதிகாரியாக இருந்ததால் கிரிக்கெட் குறித்து அதிகம் கற்றுக்கொள்ள உதவியாக இருந்தது.

டேனியல், ராம்பாட்டீல், வி.வி.எஸ். லஷ்மண் ஆகியோரின் கிரிக்கெட் அகாடமிகளில் ஆரம்பக்கட்ட பயிற்சிகளை நிறைவு செய்தேன். 19 வயதுக்குட்பட்டோருக்கான மாநில அணியில் ஆல்-ரவுண்டர் வாய்ப்பு கிடைத்தது. விளையாடி எண்ணை நிரூபித்தேன்.

நாம் கற்றுக்கொண்டதை நால்வருக்கும் கற்றுக்கொடுக்க வேண்டும் என்பது எனது சித்தாந்தம். அதன்படி வாழ்ந்து வருகிறேன். அணியில் இணையும் இளம் வீரர், வீராங்கனைகளுக்கு விளையாட்டு குறித்து கற்றுக்கொடுப்பேன். எனது ஆர்வத்தை கண்ட பயிற்சியாளர், நேரம் கிடைக்கும்போதெல்லாம் எனக்கு கற்றுக்கொடுத்தார்.

கரோனா காலகட்டத்தில் போடப்பட்ட லாக்டவுன் எனக்கு கூடுதல் உதவியாக அமைந்தது. ஆன்லைன் மூலம் பயிற்சியாளர்களுக்கான புத்தகங்களைப் பதிவிறக்கம் செய்து வாசிக்கத் தொடங்கினேன். மேலும் சர்வதேச கிரிக்கெட் கவுன்சிலின் இணையப் பக்கத்தில் கிடைத்த தகவல்களை கொண்டு பயிற்சியாளருக்கான தகுதிகளை வளர்த்துக்கொண்டேன்.

பயிற்சி தொடர்பான சந்தேகங்களை எனது பயிற்சியாளர்களிடம் கேட்டறிந்து நிவர்த்தி செய்துகொள்வேன். அந்த நேரத்தில் தான் ஐசிசி ஆண்டுக்கு இருமுறை பயிற்சியாளர்களை தேர்வு செய்வது குறித்து அறிந்தேன். உடனடியாக விண்ணப்பிக்கவும் செய்தேன்.

விளையாட்டு மற்றும் பயிற்சி தொடர்பாக கேள்விகள் கேட்கப்பட்ட நிலையில், அனைத்திற்கும் பதிலளித்து தேர்ச்சி பெற்றேன். 30 முதல் 40 பேர் இரு பிரிவாக தேர்ந்தெடுக்கப்பட்ட நிலையில் கூகுள் மீட் மூலம் நடைபெற்ற பாடநெறி தேர்விலும் வெற்றி பெற்று முதல் நிலையில் தேர்வானேன்.

தெலங்கானாவில் இருந்து முதல்முறையாக தேர்வான பெண் பயிற்சியாளர் என்ற சிறப்பை பெற்றேன். என்னுடன் சேர்த்து மற்ற மாநிலங்களைச் சேர்ந்த இரு பெண்களும் பயிற்சியாளர்களாக தேர்வானார்கள்" என புர்ரா லஸ்யா தெரிவித்துள்ளார்.

கிரிக்கெட்டைத் தவிர்த்து படிப்பிலும் ஆர்வம் மிகுந்தவராக காணப்படும் புர்ரா லஸ்யா, ஹைதராபாத்தில் உள்ள கே.எல். பல்கலைக்கழகத்தில் இளங்கலை வணிக மேலாண்மைத் துறையில் பட்டம் பெற்றுள்ளார். மேலும் அமெரிக்காவில் முதுகலை பட்டப்படிப்பு படித்து வருகிறார்.

அமெரிக்கா சென்றாலும் கல்லூரிக்குச் செல்வதற்கு முன், நாள்தோறும் பயிற்சியை தவறவிடாமல் மேற்கொண்டதால் தான் தன்னால் சாதிக்க முடிந்துள்ளதாக புர்ரா லஸ்யா தெரிவித்துள்ளார். மேலும் இந்திய அணியில் தெலங்கானா பெண்களுக்கு என தனி இடத்தைப் பிடிப்பதும், ஹைதராபாத் கிரிக்கெட் சங்கத்தில் சிறந்த விளையாட்டு வீராங்கனைகளை உருவாக்குவதுமே தனது வாழ்நாள் கனவு என புர்ரா லஸ்யா தெரிவித்துள்ளார்.

இதையும் படிங்க:டெல்லி இளம்பெண் கொலை: டூவீலரில் இருந்த மற்றொரு பெண் யார்? - பகீர் கிளப்பும் பின்னணி